Ońtústik Koreıa bıligi Qytaıdyń Temu marketpleısin 260 myń dollardan astam aıyppul tóleýge mindettedi. Business Korea portalynyń habarlaýynsha, kompanıa tutynýshylardy adastyratyn jarnama taratqany úshin aıyppul arqalaǵan.
2025 jyldyń 11 maýsymynda Ońtústik Koreıanyń ádil saýda jónindegi komısıasy Temu kompanıasyn birneshe ret jalǵan jarnama taratqany úshin jaýapkershilikke tartý týraly sheshim shyǵardy.
Koreı baspasóziniń málimetinshe, 2023 jyldyń tamyzynan bastap 2024 jyldyń naýryzyna deıin el aýmaǵynda Temu qosymshasynyń keri sanaǵy bar jarnama banneri taralǵan. Onda kórsetilgen aqparat boıynsha, keri sanaq aıaqtalǵanǵa deıin qosymshany ornatqan qoldanýshylar jeńildikterge ıe bolatyny aıtylǵan. İs júzinde, qosymshadaǵy baǵalar ornatylǵan ýaqytqa múldem baılanysty bolmaǵan.
Sondaı-aq, ońtústikkoreıalyq retteýshi Temu usynǵan qosymsha upaı jınaý júıesin de jalǵan dep baǵalady. Syrttaı qaraǵanda, qoldanýshylarǵa tek vırtýaldy «rýletkany» aınaldyrý usynylǵanymen, is júzinde olar qosymsha áreketterdi oryndaýǵa májbúr bolǵan. Mysaly, qosymsha upaı jınaý úshin qoldanýshy Temu qosymshasyn úshinshi tarapqa júkteý siltemelerin taratýǵa mindettelgen.
«Ádette tutynýshylar mundaı aksıalarǵa qatysýdy jarnamalyq habarlamalarǵa súıenip sheshedi. Temu jaǵdaıynda naqty talaptardy olar tek edáýir ýaqyt pen kúsh jumsaǵannan keıin ǵana bilgen», – dedi baspasózge Ádil saýda komısıasynyń ókili.
Buǵan qosa, 2025 jyldyń mamyr aıynyń ortasynda Ońtústik Koreıanyń Jeke aqparatty qorǵaý komısıasy Temu marketpleısine shamamen bir mıllıon dollar aıyppul salyp, jazalaǵan. Komısıa marketpleısti azamattardyń jeke derekterin qorǵaý zańyn buzǵan dep tanydy. Resmı málimdemede Temu qoldanǵan Ońtústik Koreıa azamattarynyń jeke málimetterin jınaý, saqtaý jáne óńdeý tásilderi el zańnamasyna sáıkes emestigi aıtylǵan.
Sonymen qatar, qosymshadan tirkeýin alyp tastaǵysy kelgen paıdalanýshylar jeti kezeńnen turatyn kúrdeli júıege tap bolǵan. Komısıa ókilderi bul azamattardyń óz quqyqtaryn tolyq paıdalanýyna kedergi keltirgenin málimdedi.
Aıta keteıik, Qazaqstanda Temu jáne basqa iri sheteldik marketpleısterge qoıylatyn talaptardy qatańdatý usynylyp jatyr. Osy jyldyń basynda depýtat Azat Perýashev sheteldik satýshylarǵa salynatyn salyq aýyrtpalyǵy QQS somasyna qaraǵanda, kóbinese otandyq satýshylarmen salystyrǵanda tómen ekenine narazylyq bildirgen bolatyn.
Ol sheteldik marketpleıster arqyly el aýmaǵyna arzan taýarlardy bajsyz ákelý erejelerin qaıta qaraýdy usyndy. Depýtat mundaı shara qoldanylmasa, qazaqstandyq kásipkerlerdiń naryqtan yǵystyrylýy múmkin dep alańdaıdy.
