Shymkentte 21 jastaǵy Nuraı Serikbaıdyń pyshaq jaraqatynan qaza tabýynan keıin Qyzylorda turǵyny Jazıra Qýanyshbaı áleýmettik jelide jazba jarıalap, óz ómirine qaýip tónip turǵanyn aıtty, dep habarlaıdy bairaqmedia.kz.

Onyń aıtýynsha, belgisiz bir adam jarty jyldan beri ózin mazalap keledi. Qyz áleýmettik jelidegi jazbasynda bul jaǵdaıdyń Nuraı Serikbaıdyń basynan ótken oqıǵaǵa uqsas ekenin jetkizgen.

«Týra Nuraıdyń oqıǵasy meniń basymnan ótip jatyr. Qyzylordada turamyn, polısıa men prokýratýraǵa 2-3 ret aryz jazdym. Júrgen jerimde 102 shaqyryp qaıtamyn nemese jalǵyz júrmeımin. Prokýratýra mundaı isti qaramaıtynyn aıtyp, polısıaǵa ysyra saldy. Al polısıaǵa bapty kórsetip, sol adam týraly barlyq derekti berdim. Ańdyp júrgen foto, vıdeo dálel bar. Sonda da nomenklatýralyq is dep jyly jaýyp qoıdy», – dep jazdy ol.

Atalǵan jaǵdaıǵa baılanysty Qyzylorda oblystyq polısıa departamenti túsinikteme berdi. Vedomstvo málimetinshe, stalkıng deregi boıynsha qylmystyq is qozǵalǵan.

«Qazirgi ýaqytta oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan qajetti tergeý áreketteri júrgizilip jatyr. Qylmystyq istiń tergelý barysy departament basshylyǵynyń baqylaýynda», – delingen polısıa jaýabynda.