Meshitterdegi jazǵy saýat ashý kýrstary jat aǵymdardyń aldyn alýǵa kómektesedi. Bul týraly Túrkistan oblysy Din isteri basqarmasyna qarasty "Din máselelerin zertteý ortalyǵynyń" teolog mamany Qaısar Myrzabaı málimdedi, dep habarlaıdy bairaqmedia.kz
Búginde meshitter tek qulshylyq ordasy ǵana emes, rýhanı, mádenı jáne aǵartýshylyq orny retinde damyp keledi. Ásirese, jazǵy ýaqytta uıymdastyrylatyn saýat ashý kýrstary – meshitterdiń qoǵam aldyndaǵy jaýapkershiligin kórsetetin mańyzdy jobalardyń biri.
Meshit – musylman qoǵamynyń rýhanı tiregi ǵana emes, tarıhı turǵydan bilim men mádenıettiń, áleýmettik úılesimdiliktiń oshaǵy jáne óz qyzmetin zaman talabyna beıimdeı otyryp, jastardyń bilimdi, parasatty, ımandy azamat bolyp qalyptasýyna úlken úles qosýda. Islam úmmeti «Oqy!» degen alǵashqy aıatpen jaratylystyń maǵynasyn uǵynýǵa, bilimge umtylýǵa mindetteldi. Islam tarıhynda meshitter Haziret Muhammed (s.a.s.) dáýirinen bastap bilim berý men tárbıe ortalyǵy bolǵany belgili. Búginde meshitterde: Tápsir, hadıs, aqıda, fıkh dáristeri ótedi; Balalarǵa jazǵy saýat ashý kýrstary uıymdastyrylady; Áıelderge arnaıy ýaǵyz-sabaqtar oqytylady; Jastarǵa arnalǵan motıvasıalyq kezdesýler ótkiziledi, - dedi teolog.
Qazaqstan musylmandary dinı basqarmasynyń resmı málimetine sáıkes, 2024 jyly ár túrli dinı saýat ashý kýrstaryna jalpy 22 300-den asa adam qatysqan. Onyń ishinde 15789 adam namaz úırený kýrstaryna, 6050 adam quran jattaý kýrstaryna baǵyttalǵan «Muǵalim sánı» jáne «Namaz úırený», «Imandylyq álippesi» kitaptary arqyly oqyǵan.
Meshitter tek jazda emes, jyl boıy mynadaı baǵyttarda aǵartýshylyq qyzmet júrgizýde: Úlkenderge arnalǵan dinı saýat kýrstary (áıelderge de arnalǵan toptar), jastar klýbtary men semınarlar, otbasylyq keńes berý ortalyqtary, dástúr men dinniń úndestigine negizdelgen dárister. Bul kýrstarda balalarǵa: Quran álippesi (Muǵálim sánı), namaz negizderi, paıǵambarlar tarıhy, ádep-ahlaq sabaqtary, Otansúıgishtik pen ulttyq qundylyqtar taqyryptary túsindiriledi. Qala ortasyndaǵy meshitke kirseńiz, tańerteńgi sabaqqa asyqqan shákirtterdi, eresekter tobyndaǵy aqsaqaldardy, ata-anasynyń qolynan ustap kelgen kishkentaılardy kórýge bolady. Bul – meshittiń búgingi bolmysy. Ol tek namaz oqyp shyǵatyn oryn emes, - dedi Túrkistan oblysy Din isteri basqarmasyna qarasty "Din máselelerin zertteý ortalyǵynyń" teolog mamany Qaısar Myrzabaı.
