Aqtóbedegi meshitte bolǵan jaǵdaıǵa pikir bildiremin dep basy daýǵa qalǵan eks-ánshi Rústem Júginisovtiń «tórt áıel alamyn» degen sózi áleýmettik jelide qaıta qyzý talqylaǵa tústi, dep habarlaıdy bairaqmedia.kz.

Eske sala keteıik, Rústem Júginisov Instagram-daǵy paraqshasynda 4 áıel alýdy josparlap júrgenin aıtyp, erlerdi kóp áıel alýǵa shaqyrǵan bolatyn.

«Erkekterdiń 95 paıyzy kóp áıel alǵysy keledi. Onyń ishinde ózim de barmyn. Qalǵan 5 paıyzy bir áıelim jetedi dep júrgender, kóp áıel alýǵa áli daıyn emespin dep oılap júrgender de bar shyǵar. Ár erkek kóp áıel alǵysy keledi dep oılaımyn. Men 4 áıel alǵym keledi», - dedi ol.

Kópshilik ánshiniń bul aıtqanyn túsine almaı, synap jatyr.

«Bul baıaǵydan osyndaı eken ǵoı», «Óleń aıtyp júrgeniń jaqsy edi», «Tıispeńdershi ózi bilsin», «Joldan adasqan eken, táýbege kel baýyrym», «Tym jaqsy bala edi, buzylypty», - dep jazyp jatyr jeli qoldanýshylary.

Aıta keteıik, prezıdent Toqaev kóp áıel alýshylyqty nasıhattaıtyndardy qatań synaǵan edi.

«Elimizde qyz alyp qashýdy, kóp áıel alýdy ulttyq dástúr sanap, el ishinde dáriptegisi keletinder bar. Bul – múldem aqtaýǵa bolmaıtyn zańsyzdyq, qarańǵylyq, tipti, masqara tirlik. Órkenıetti qoǵamda ár azamattyń abyroıy, quqyǵy jáne bostandyǵy baǵa jetpes qundylyq bolýy kerek. Sondyqtan mundaı aqylǵa syımaıtyn áreketterdi qatań synǵa alý jetkiliksiz. Oǵan quqyqtyq baǵa berilip, birjola tosqaýyl qoıylýǵa tıis», - degen bolatyn memleket basshysy.