Tanymal ánshi Tolqyn Zabırova dańqty áskerı qolbasshy, Halyq qaharmany Baýyrjan Momyshulynyń týǵan kúnine qatysqan sáti týraly esteligimen bólisti, dep habarlaıdy bairaqmedia.kz.

Óner ıesi bul týraly áleýmettik jelidegi paraqshasynda jazǵan. Onyń aıtýynsha, bala kezinde Baýyrjan Momyshulynyń týǵan kúnine qatysý taǵdyrdyń sırek syıy bolǵan.

«Búgin — Baýyrjan Momyshuly atamyzdyń týǵan kúni. Ańyzǵa aınalǵan, el rýhynyń sımvoly Uly Jeńis batyry. Men úshin bul kún erekshe. Sebebi bala kúnimde — shamamen 7–8 jasymda — taǵdyr maǵan sırek buıyratyn bir úlken baq syılaǵan. Ol Baýyrjan atamyzdyń týǵan kúnine qatysý múmkindigi. Bul da árıne, meniń naǵashy ájemniń arqasy. Ájem — ózi óte shyǵarmashyl, minezi berik, bilimge qushtar jan edi. Osyndaı qasıetteri úshin ony Baýyrjan atamyzdaı uly tulǵalar erekshe qurmetteıtin. Sol kún áli esimde — úlken zal, uzyn dastarhan, aınalasynda elge belgili azamattar. Biz kirgen sátte Baýyrjan atamyz ornynan turyp, ájemdi qarsy alyp, qolynan ustap, ózi otyrǵan tórge deıin shyǵaryp saldy da, qasyna otyrǵyzdy. Men de ájemniń janynda otyrdym. Ájemniń Baýyrjan ataǵa arnap jazǵan óleńi bar edi, sony sómkesine salyp qoıýymdy ótingen bolatyn, biraq bala kóńilmen ony men umytyp ketken edim. Sonda da ájem abdyrap qalmady — óziniń tereń bilimi men sýyrypsalma talantynyń arqasynda sol jerde-aq júrekten shyqqan jyryn oqyp berdi. Zalda otyrǵandardyń bári qol soǵyp, rıza bolǵany áli kúnge deıin kóz aldymda», — dep jazdy T. Zabırova.

Sonymen qatar ánshi ótken kúnderge degen saǵynyshyn da jasyrmady.

«Búgin sol sátterdi úlken saǵynyshpen eske alamyn. Baýyrjan Momyshuly atamyz ómirden ótse de, onyń erligi, rýhy, ónegesi — máńgi. Búgingi beıbit ómirimiz, erkin bolashaǵymyz — osyndaı batyrlardyń arqasy. Uly tulǵalar umytylmaıdy. Elińiz sizdi árdaıym qurmetpen eske alady», — dedi ol.