Qazaqstandyq kásipqoı boksshy, WBO jáne IBF nusqalary boıynsha orta salmaqtaǵy álem chempıony Jánibek Álimhanulyna qatysty týyndaǵan dopıng daýyna baılanysty onyń menedjeri Berik Sultan alǵash ret keń kólemde pikir bildirdi, dep habarlaıdy bairaqmedia.kz. 

Menedjerdiń aıtýynsha, qazirgi tańda bul iske qatysty túpkilikti sheshim shyqpaǵan. Sondyqtan chempıondyq belbeýlerden aıyrý nemese sportshyny belgili bir merzimge shettetý týraly aıtý áli erte.
Berik Sultan jankúıerlerge arnaıy úndeý jasap, qoldaý bildirip jatqan barshaǵa alǵysyn jetkizdi. Onyń sózinshe, jaǵdaıdyń qalaı órbıtini kópshilikti alańdatyp otyr.

«Bizdiń qateligimizge qýanyp, mansabymyz aıaqtaldy dep jatqandar bar. Alaıda óz jankúıerlerimiz bizdi qoldap, kinásiz ekenimizge senip otyr. Bul biz úshin óte mańyzdy», – dedi ol.

Menedjer bul daýdyń komanda úshin kútpegen jaǵdaı bolǵanyn atap ótti. Onyń aıtýynsha, daıyndyq barysynda VADA tarapynan alynǵan alǵashqy zár men qan synamalary taza shyqqan. Komanda árdaıym taza sportty qoldaıtynyn jáne bul ustanymynan aınymaǵanyn aıtady. Sebebi Jánibekke tek Qazaqstanda emes, álemniń túkpir-túkpirindegi jas sportshylar úlgi tutady. Synama nátıjeleri áleýmettik jelilerde de jarıalanǵan.

Araǵa ýaqyt salyp, mamandar qaıta kelip, tek zár synamasyn alǵan. Ushýǵa birneshe kún qalǵanda osy másele habarlanyp, komanda úshin bul jaǵdaı kútpegen jańalyq bolǵan.

Berik Sultan eki synamanyń arasynda sportshynyń daıyndyǵynda eshqandaı ózgeris bolmaǵanyn erekshe atap ótti. Onyń sózinshe, taǵam rasıony da, vıtamınder de sol kúıinde qalǵan. Qoldanylǵan barlyq qospalar sportshylarǵa ruqsat etilgen. Tipti vıtamınderdiń ózi tekseristen ótip, taza ekeni anyqtalǵan. Alaıda bul jaǵdaıdyń qalaı oryn alǵanyna áli kúnge deıin naqty jaýap joq.
Soǵan qaramastan, komanda Jánibek Álimhanulynyń kinásiz ekenine tolyq senimdi. Menedjer B synamanyń nátıjesi sony dáleldeıdi dep úmittenetinin jetkizdi.

Onyń aıtýynsha, oń nátıje shyqsa, mansapty jalǵastyryp, chempıondyq tıtýldardy saqtap qalýǵa múmkindik bar.

Degenmen, jaǵymsyz sheshim de joqqa shyǵarylmaıdy. Eger synama oń nátıje kórsetse, boksshy WBO jáne IBF belbeýlerinen aıyrylyp, jarty jyl nemese bir jylǵa dıskvalıfıkasıa alýy múmkin. Biraq Berik Sultan mundaı jaǵdaıda da berilmeıtinderin aıtty. 

Onyń sózinshe, Jánibek nebári 33 jasta, al Terens Kroýford 38 jasynda Saýl «Kanelo» Alvaresti jeńgen. Sondyqtan alda alynbaǵan asýlar kóp.
Qazirgi ýaqytta Jánibek Álimhanuly Qazaqstanda júr.

«Qazir eldemiz, óz-ózimizge kelip jatyrmyz», – dep túıindedi menedjer.

Aldaǵy kúnderi ashylatyn B synamasy qazaqstandyq boksshynyń bolashaǵyn aıqyndaıdy. Bul tek bir jekpe-jektiń emes, tutas chempıondyq joldyń taǵdyryn sheshetin sát bolmaq.