Islam oıyndarynda qazaqstandyq 97 sportshynyń 56-sy medal jeńip aldy, ár tórtinshi medal – altyn, dep habarlaıdy Sport jáne dene shynyqtyrý komıteti.
Ar-Rıad qalasynda One Nation – Bir ult uranymen ótken VI Islam yntymaqtastyǵy oıyndary óz máresine jetti.
Jarysqa 57 eldiń sportshylary qatysty.
Qazaqstan quramasy 16 sport túrinen óner kórsetti: jeńil atletıka, kıbersport, semserlesý, gandbol, jıý-jıtsý, dzúdo, karate, júzý, ústel tenısi, taekvondo, aýyr atletıka, erkin kúres, grek-rım kúresi, áıelder kúresi, ýshý jáne mýaı-taı.
"Al boks, voleıbol, at sporty, 3h3 basketbol, fýtzal, dýatlon, túıe jarysy syndy sport túrleri belgili sebepterge baılanysty jarysqa qatystyrylǵan joq", - deıdi vedomstvo.
Otandyq sportshylar Islam yntymaqtastyǵy oıyndarynda barlyǵy 56 medal jeńip aldy: 15 altyn, 20 kúmis jáne 21 qola.
Birqatar sport túrinde alǵash ret el qorjynyna altyn medal tústi. Atap aıtsaq, dzúdodan Arýna Jangeldına, ústel tenısinen Kırıll Gerasımenko, mýaı-taıdan Turar Dúısehan jeńiske jetti. Semserlesýden erler komandasy oq boıy ozdy. Al otandastarymyz jıý-jıtsýda úsh altyn jeńip, úzdik shyqty.
