Qazaqstannyń Birikken Arab Ámirlikterindegi elshisiniń keńesshisi bolǵan Sáken Mamashqa qatysty sot úkimi shyqty, dep habarlaıdy bairaqmedia.kz.
Ol qylmystyq kodekstiń 110-baby (azaptaý) boıynsha aıyptaldy. Bul bap 4 jyldan 7 jylǵa deıin bas bostandyǵynan aıyrý jazasyn qarastyrady.
Sýdıa Sáken Mamashty kináli dep tanyp, ortasha qaýipsizdik mekemesinde 6 jylǵa bas bostandyǵynan aıyrý jaıly sheshim qabyldady. Sondaı-aq sot ony birinshi dárejeli keńesshi dıplomatıalyq dárejesinen aıyrý týraly sheshim qabyldady.
«Negizsiz qyzǵanyshtyń saldarynan sottalýshy Mamash, memlekettik qyzmetker retinde ant bergen tulǵa bola otyryp, 2019 jyldan 2024 jylǵa deıingi kezeńde Astanada, keıinnen Birikken Arab Ámirlikterinde, Abý-Dabıde jábirlenýshige júıeli túrde kúsh kórsetip, denesiniń ártúrli bóligi men basyna judyryqpen soqqy jasaǵan. Sottalýshynyń kinási jábirlenýshiniń, kýálardyń aıǵaqtarymen, saraptama qorytyndylarymen, beınejazbalarmen, skrınshottarmen jáne istiń basqa da materıaldarymen dáleldendi. Qylmystyq is júrgizý kodeksiniń 387-390, 393, 395-398, 401-402-baptaryn basshylyqqa ala otyryp, sot Mamash Sáken Táshkenbaıulyn QR Qylmystyq kodeksiniń 110-baby 2-bóligi 1-tarmaǵynda kózdelgen qylmysty jasaǵany úshin kináli dep tanyp, oǵan ortasha qaýipsizdik mekemesinde 6 jyl bas bostandyǵynan aıyrý jazasyn taǵaıyndady», – dedi sýdıa Artýr Abdyqanov.
Aıta ketý kerek, eks-dıplomattyń jubaıy Karına Mamashtyń 10 jyl boıy kúıeýi uryp-soǵyp kelgen degen málimdemesinen keıin Sáken Mamash Dýbaıdaǵy qyzmetinen elge qaıtarylǵan edi.
