Búgin túngi saǵat úshten bastap Astanadaǵy Baıqońyr aýdanynda ornalasqan «Bıg Shanhaı» bazarynyń úsh qabatty ǵımaratynda bolǵan iri órtpen Tótenshe jaǵdaılar departamentiniń qyzmetkerleri kúresip jatyr. Órt tańǵy 07:10-da oqshaýlanǵanymen, sóndirý jumysy áli de jalǵasyp jatyr, dep habarlaıdy Azattyq Rýhy.
QR Tótenshe jaǵdaılar mınıstrliginiń baspasóz qyzmetiniń málimetinshe, alǵashqy bólimsheler oqıǵa ornyna kelgen sátte órt edáýir órship ketken. Ǵımarattyń qabat aralyq jabyndary jartylaı qulaǵan, qalyń tútin basqan. Sonymen qatar, órttiń qosalqy galereıa arqyly kórshiles ornalasqan «Orda» bazaryna taralý qaýpi bolǵan.
Oqıǵa ornynda órt sóndirý shtaby qurylyp, úzdiksiz sý berý uıymdastyryldy, birneshe órt sóndirý qurylǵysy jumys istep jatyr. Órtke joǵary dárejeli rang berilgen. Qaza tapqandar men zardap shekkender joq, 112 qyzmetine tıisti habarlamalar túspegen.
«Bazar ákimshiligi órt týraly habarlamaǵan. Órtti birinshi jáne úshinshi qabat terezelerinen shyqqan qoıý qara tútindi baıqaǵan órt sóndirý bóliminiń qyzmetkerleri anyqtaǵan», – dep habarlady TJM.
Qazirgi ýaqytta órtti tolyq joıý boıynsha jumys jalǵasýda – ot oshaqtaryn sýmen sóndirý jáne qurylymdardy bólshekteý júrgizilýde.
Órttiń kólemi men sebebi naqtylaný ústinde. Tolyq aqparat barlyq jumys aıaqtalǵan soń jarıalanady.
Órtke baılanysty Astanada «Bıg Shanhaı» bazaryndaǵy saýda núkteleri zardap shekken kásipkerler men qyzmetkerlerge kómek kórsetý úshin arnaıy túsindirý shtaby jumysyn bastady. Bul týraly qala ákimdiginiń baspasóz qyzmeti habarlady.
Shtab Alash tasjoly, 30a mekenjaıyndaǵy «Anuar» sýpermarketiniń 3-qabatynda ornalasqan.
«Shtab jalǵa alýshylarǵa, kásipkerler men bazar qyzmetkerlerine keńes berip, quqyqtyq, qarjylyq jáne ózge de máseleler boıynsha aqparat usynýda. Árbir adam kelip, ózekti málimet alyp, ári qaraıǵy áreketterge qatysty keńes ala alady», – delingen ákimdik habarlamasynda.
Oqıǵa ornynda TJD, polısıa departamenti, ákimdik, ınvestısıalar jáne kásipkerlikti damytý basqarmasy men bazar ákimshiliginiń ókilderi kezekshilik etip, keńes berýde.
Bılik ókilderi qala turǵyndaryn tek resmı aqparat kózderine senýge shaqyrady.
