Qoǵam

Eki dáriger soqqyǵa jyǵyldy, bireýi - reanımasıada. Mınıstr dabyl qaqty

10:59, 18 shilde 2025 10

Densaýlyq saqtaý mınıstri Aqmaral Álnazarova medısına qyzmetkerlerin soqqyǵa jyǵyp, dárigerlerdiń ómirine qater tóndirgen azamattarǵa úndeý jarıalady, dep habarlaıdy bairaqmedia.kz

         «Sizderge perzenthanada meıirger, balalar aýrýhanasynyń qabyldaý bóliminde kezekshi jáne ordınator dáriger bolyp jumys istegen maman retinde ún qatqym keledi: medısına qyzmetkerlerine qarsy zorlyq-zombylyqty toqtatyńyzdar! Negizsiz, ashý men yzaǵa boı aldyrǵan qatygez áreketter kezinde óz balalaryńyzdy, ata-analaryńyzdy, jaqyndaryńyzdy aman alyp qalýǵa jan salyp júrgen dáriger men meıirgerdiń boıyn bılegen jan jarasy men qorlyǵy, qorǵansyzdyǵy men úreıin elestetý múmkin emes. Biz taǵy da Qaraǵandy men Qostanaıda bolǵan eki soraqy jaǵdaıǵa kýá bolyp otyrmyz. Qaraǵandyda jeke klınıkanyń meıirgerine shabýyl jasaldy. Qostanaı oblystyq aýrýhanasynda ýrologıa bóliminiń jas hırýrgi qatygezdikpen soqqyǵa jyǵyldy. Pasıent óz kezegin kútkisi kelmegendikten, dárigerdi uryp, esinen tandyrǵan. Qazir dáriger reanımasıada. Jaǵdaıy – aýyr. Adam ómirin arashalap júrgen janǵa qol kóterý úshin adam qanshalyqty deńgeıde qatigez jáne meıirimsiz bolýy kerek?» - dedi mınıstr.

      Mınıstr bul – búkil densaýlyq saqtaý júıesine tóngen tikeleı soqqy dep málimdedi.

     «Bul – tek bir dárigerge jasalǵan shabýyl emes. Bul – ondaǵan pasıenttiń qaraýsyz qalýy, ondaǵan operasıanyń keıinge shegerilýi. Bul – búkil densaýlyq saqtaý júıesine tóngen tikeleı soqqy. Shabýyl jasalǵan qabyldaý bólimderi – onsyz da qaýipi joǵary aımaqtar. Osyǵan baılanysty medısına qyzmetkerlerine jasalǵan shabýyl úshin jaýapkershilikti kúsheıtýge baǵyttalǵan zańnamalyq ózgerister bıylǵy qyrkúıekte Parlamentke engiziledi. Mundaı áreketterdi turmystyq qaqtyǵys retinde emes, qoǵamdyq qaýipsizdikke tóngen qaýip retinde baǵalaý qajet», - dedi Álnazarova.

     Osy oqıǵalardan keıin elimizdegi barlyq medısına mekemelerinde kúzet kúsheıtiledi. 

  

«Barlyq medısınalyq uıym beınebaqylaý júıesimen, kúzetpen jáne dabyl batyrmalarymen qamtamasyz etilýi tıis. Taǵy da barshańyzdy barlyq deńgeıde órkenıetti qarym-qatynas mádenıetin saqtaýǵa shaqyramyn. Biz balalarǵa jas kezinen medısına qyzmetkerleriniń eńbegin qurmetteýdi, alǵys aıtý mádenıetin úıretýimiz kerek. Japa shekken áriptesimizdiń ómirin saqtaý úshin Densaýlyq saqtaý mınıstrligi barlyq qajetti ári batyl shara qabyldaıtyn bolady», - dedi mınıstr.  

Aqmaral Álnazarova jumys kezinde zardap shekken dárigerdiń sanıtarıalyq avıasıamen Ulttyq shuǵyl medısınany úılestirý ortalyǵyna jetkizilip, em qabyldaıtynyn aıtty.

 

Bizdiń Telegram arnamyzǵa jazylyp, sońǵy aqparatty oqyńyz. Eger habarlama joldaǵyńyz kelse, WhatsApp-qa jazyńyz.

ls_Readalso