Jeli qoldanýshysy Astanadaǵy kafeniń birinde sumdyq jaıtqa tap bolǵan. Onyń aıtýynsha, ǵımarat ishindegi arnaıy oıyn alańynda júrgen balasynyń tabanyna medısınalyq shprıstiń ınesi kirip ketken, dep habarlaıdy Azattyq Rýhy.
«Keshki saǵat 22:00 men 23:00 aralyǵynda otbasymyzben Jánibek Tarhan kóshesi, 6B mekenjaıyndaǵy SF shaýrma fýd kafesine bardyq. Eki balamyzǵa alańda oınaý úshin kirý aqysyn tóledik. Sol jerde ulymnyń tabanyna búgilgen medısınalyq shprıs kirip ketip, jaraqat aldy. Ineni belgisiz bireý tastap ketken. Balamnyń densaýlyǵyna qatty alańdaımyn, ıneni áldekim ádeıi tastap ketýi múmkin. Endi balam 6 aı boıy ınfeksıonıstke qaralý kerek», - dedi alańdaǵan ana.
Onyń sózinshe, oqıǵa ornyna jedel járdem men polısıa shaqyrylǵan, biraq áli kúnge deıin polısıa tarapynan esh áreket jasalmaǵan kórinedi.
Ol ıneniń fotosyn, medısınalyq anyqtamalardy jarıalady.
Osyǵan qatysty agenttik tilshisi qalalyq Qoǵamdyq densaýlyq saqtaý basqarmasyna saýal joldady.
«Pasıentti №2 kópsalaly qalalyq balalar aýrýhanasynyń qabyldaý bóliminde dárigerler tekserdi. Aýyr jaraqattar anyqtalmaǵandyqtan, bala turǵylyqty mekenjaıy boıynsha ambýlatorıalyq em alýǵa jiberildi», – delingen Qoǵamdyq densaýlyq saqtaý basqarmasy habarlamasynda.