Qazaqstandyq boksshy Jánibek Álimhanulynyń dopıng daýyna qatysty isi 23 qańtarda qaıta qaralmaq. Bul týraly Qazaqstan kásipqoı boks federasıasynyń prezıdenti Rahymjan Erdenbekov Instagram áleýmettik jelicindegi paraqshasynda jazdy, dep habarlaıdy bairaqmedia.kz.

Erdenbekovtiń aıtýynsha, Qazaqstan kásibı boks federasıasynyń Tártiptik komısıasy bul is boıynsha alǵashqy tyńdaýdy ótkizgen. Onyń maqsaty asyǵys qorytyndylarǵa kelý emes, kerisinshe, materıaldardy bastapqy baǵalaý, prosedýralyq aspektilerdi tekserý jáne dáleldemeler bazasynyń tolyqtyǵyn anyqtaý boldy, dep túsindirdi ol.

"Osy kezeńde de isti tek bir ǵana analıtıkalyq nátıjege súıene otyryp, resmı túrde qaraý múmkin emes ekeni belgili boldy. Tyńdaý barysynda saraptamalyq, medısınalyq jáne quqyqtyq baǵalaýdy qajet etetin qosymsha mán-jaılar anyqtaldy. Sondyqtan Tártiptik komısıanyń tóraǵasy retinde men 23 qańtarǵa qaıta sot otyrysyn taǵaıyndaý týraly sheshimdi qoldadym. Bul erekshelik emes, halyqaralyq saldary bolýy múmkin kúrdeli isterde qoldanylatyn kásibı tájirıbe. Men negizgi máseleni atap ótkim keledi: dopıng-testtiń oń nátıjesiniń ózi sportshynyń nıetiniń nemese eleýli kinásiniń dáleli bolyp sanalmaıdy. Halyqaralyq dopıngke qarsy standarttar zattyń jutylý sebepterin, sportshynyń muqıattylyq dárejesin jáne testileýden buryn jáne keıin olardyń minez-qulqyn taldaýdy talap etedi", - dedi ol.

Sondaı-aq ol komısıa isti "Eleýli kiná nemese nemquraılylyq joq" qaǵıdasyna sáıkes qarastyryp jatqanyn da atap ótti.

Komısıa quramyna federasıanyń, memlekettik sport organynyń, Ulttyq dopıngke qarsy ortalyqtyń, medısınalyq komısıanyń jáne halyqaralyq tóreshi ókilderi kirgen.

"Kez kelgen sheshim tek faktiler negizinde, ádildik qaǵıdattary men halyqaralyq sport quqyǵyna sáıkes qabyldanady. Qaıta sot otyrysy 23 qańtarǵa josparlanǵan. Oǵan deıin tártiptik komısıa barlyq is materıaldaryn qaraýdy jalǵastyrady", - dep málim etti ol.