Almaty oblysynda er adam 15 jyl boıy otasqan áıelin qyzynyń kózinshe pyshaqtap óltirdi. Ata-ájesin kómekke shaqyrǵan da sol kishkentaı qyzy eken. 39 jasynda úzilgen Jazıranyń denesin týystary keshe jer qoınyna tapsyrdy. Al kúdiktini polıseıler qylmys bolǵan kúni ustaǵan. Marqumnyń jaqyndary oǵan eń aýyr jaza surap otyr, dep habarlaıdy bairaqmedia.kz KTK arnasyna silteme jasap.

Jantúrshilerlik oqıǵa sársenbi kúni úıde bolǵan. 45 jastaǵy er adam áıelge birneshe márte pyshaq suǵyp, tósegine jatqyzyp ketken. Eń soraqysy, qandy qylmys bes jasar qyzynyń kóz aldynda bolypty.

Kúdikti izin jasyrmaq bolyp úıin tazalap, qanǵa boıalǵan súlgini gaz peshtiń artyna jasyryp ketken. Qanjosa bolǵan áıelin uıyqtap jatqan qyzynyń qasyna jatqyzyp, ústine kórpesin jaýyp ketipti. Sóıtip qyzy tańerteń uıqysynan oıana sala, birden ata-apasynyń úıine kómek suraýǵa barǵan.

— Gazdy jyljytqan kezde gazdyń artynan qan-qan súlgiler shyqty. Úıdi tazalap, tósekke jatqyzyp, ústine kórpe jaýyp, janynda qyzy uıyqtap jatqan ǵoı, sonyń janyna jatqyzyp ketken. Olar bólek, joǵarǵy úıde turady, áke-sheshesi tómengi úıde turady. 

«Apa-aý, jedel járdem shaqyrsańshy, mamama pyshaq salyp ketti ǵoı, neǵyp otyrsyń» degende, men júgirip baryp keldim. Ústi-basynyń bári qan. Aýdaryp, koftasyn sheshkende myna jerinen, eki qoltyǵynan pyshaq tyqqan, ishine pyshaq tyqqan, - deıdi marqumnyń anasy Turash Qýanysheva. 

Anasynyń aıtýynsha, júk tasýshy bop isteıtin kúıeý balasynyń pyshaq suqpaǵan jeri joq. Ol ishimdikke áýes bolǵan deıdi. Erli-zaıyptylar 15 jyldan beri azamattyq nekede bolǵan. Sondyqtan kúdiktini qatań jazalaýdy suraıdy.

Urǵan saıyn arasyna túsetinmin. Kelip, talaı qýyp jiberdim ǵoı. Araq ishedi, aýzyna kelgenin aıtatyn shyǵar, kim biledi. Talaı aıttym, ajyrasyp ketshi, neǵylasyń buny dep. Sottasyn nemese óltirsin. Bireýdi jaldasa da, óltirtip tastasyn, - deıdi marqumnyń anasy Turash Qýanysheva. 

Qandy qylmysqa otbasyndaǵy janjal sebep bolǵan. Degenmen kórshi-qolań olardyń jıi urysqanyn «baıqamadyq» dep otyr. Marqum aýyldaǵy dámhananyń birinde aspaz bolyp jumys istegen eken.

Jazıra táteni men burynnan tanımyn ǵoı, kishkentaı kezimnen bastap. Óte jaqsy kisi. Adamǵa degen jamanshylyǵy joq. Ózinen ózi urys shyǵarý degen ádetterin kórmegenbiz, deıdi marqumnyń kórshisi Eljas Rahıman. 

Kúdikti sol kúni de mas bolǵan kórinedi. Qazir kisi óltirý baby boınysha sotqa deıingi tergep-tekserý amaldary júrgizip jatyr. 

«Aldyn ala málimetterge sáıkes, otbasyndaǵy janjalda aýyl turǵyny azamattyq nekedegi jubaıyn eki ret pyshaqtap, áıeli birneshe saǵattan keıin kóz jumǵan. Oqıǵa ornyna kelgen polısıa qyzmetkerleri kúdiktini ustap, qamaýǵa aldy. Oqıǵanyń mán-jaıyn jan-jaqty tolyq ári obektıvti anyqtaýǵa baǵyttalǵan tergeý júrgizilip jatyr», - Almaty oblysy PD bólim basshysy Ernar Sáıdildın.

Osy aıdyń basynda ǵana kúsh kórsetkish kúıeý balanyń ústinen aryz jazylǵan. Arada eki apta ótpeı, qyzynyń jansyz denesin qushaqtap ata-anasy ańyrap qaldy.