Májilis depýtaty Danıar Qasqaraýov qysqy sport salasyndaǵy birqatar problemalarǵa nazar aýdardy, dep habarlaıdy bairaqmedia.kz.

Onyń pikirinshe, Mılan men Kortına qalalarynda ótetin qysqy Olımpıada aldyndaǵy daıyndyqqa qatysty naqty esep berilmeı otyr.

«Bıyl Qazaqstan sportshylary aq Olımpıadaǵa 23 lısenzıamen qatysady. Alaıda Týrızm jáne sport mınıstrligi qysqy Olımpıadadan tek bir medal alýymyz múmkin dep málimdedi. Bul qysqy sportty damytýdaǵy naqty strategıanyń joqtyǵyn kórsetedi», – dedi depýtat.

Ol sondaı-aq birneshe mańyzdy máselelerdi atap ótti:

Sportshylardyń daıyndyǵy qajetti deńgeıde me jáne Olımpıadadan naqty qandaı nátıje kútýge bolady.

Sport jáne deneshynyqtyrý isteri komıtetiniń resmı saıtynda memlekettik tilde mardymdy aqparat joq. Búdjettiń oryndalýy týraly derekter 2022 jyldan beri jańartylmaǵan. «Daıyndyqqa bólingen 13,3 mlrd teńgeniń esebi qaıda?» – dedi Qasqaraýov.

Almaty oblysyndaǵy «Qysqy sport túrlerinen respýblıkalyq Alataý joǵary sport sheberligi mektebi» úsh jyldan beri jabyq tur. 2022–2023 jyldary onyń kúrdeli jóndeýine búdjetten 3 mlrd teńgeden astam qarajat bólingen. Alaıda mektep áli iske qosylmaǵan. Sol kezde oǵan jyl saıyn 1 mlrd teńgeden astam qarjy bólinýiniń sebebi túsiniksiz.

Rıdder qalasyndaǵy respýblıkalyq mamandandyrylǵan mektep-ınternat-kolledjinde qurylys jumystary da aıaqtalmaǵan. 250 bala oqıtyn mekemege jyl saıyn 2 mlrd teńge bólinedi, biraq nátıje kóńil kónshitpeıdi.

Olımpıada aldyndaǵy mańyzdy sátte tý ustap shyǵatyn sportshy tapshylyǵy bar. Halyq pen jankúıerler kók baıraqty kóteretin adamnyń joqtyǵyna shaǵymdanýda, biraq mınıstrlik áli únsiz.

Depýtattyń pikirinshe, tórt jyl jetkilikti merzim, alaıda álsiz jáne myqty tustar anyqtalyp, júıeli jumys júrgizilmeı otyr.

«Bir júldeniń quny 13 mlrd teńge jumsalǵan ba?» – dep surady depýtat.

Danıar Qasqaraýov ulttyq qurama músheleriniń daıyndyqtaryn tolyq qamtamasyz etý memleket tarapynan júzege asyp otyrǵanyna qaramastan, sportshylardan naqty nátıje kútýdiń zańdy ári oryndy ekenin atap ótti.