Qazaqstandyq Beıbarys Qabylan taekvondodan Naırobıde (Kenıa) ótip jatqan jastar arasyndaǵy álem chempıonatynyń altyn júldegeri atandy, dep habarlaıdy bairaqmedia.kz.

Ulttyq Olımpıadalyq komıtettiń málimetinshe jerlesimiz 87 keliden joǵary salmaqta el namysyn qorǵady.

«Beıbarys fınalda Ońtústik Koreıa sportshysy Ian Chjýnóndy senimdi túrde jeńdi. Osylaısha, Qazaqstan jastar quramasy álem chempıonatynda alǵashqy medalin jeńip aldy», - dep jazylǵan habarlamada.

Beıbarys Qabylandy tarıhı jeńisimen memleket basshysy Qasym-Jomart Toqaev quttyqtady. 

«Beıbarys Qabylandy taekvondodan 21 jasqa deıingi jastar arasynda álem chempıony atanýymen quttyqtaımyn! Ol Kenıada ótken baıraqty básekede elimizdiń mereıin ústem etip, Qazaqstan tarıhynda taekvondodan alǵashqy altyn júldeni jeńip aldy. Sportshynyń alar asýy, baǵyndyrar bıigi kóp bolýyna tilektespin», – delingen quttyqtaýda.