Atyraý oblysynda róli oń jaqtaǵy kólikterge jolaýshy tasymaldaýǵa tyıym salyndy, dep habarlaıdy bairaqmedia.kz.
Informbúro jańalyqtar qyzmetiniń habarlaýynsha, polısıa jol apatyn azaıtý maqsatynda trassalarǵa shyǵyp, Toıota Álfard, Estıma markaly mashınalardy jappaı toqtatyp jatyr.
Bul shekteý taksı qyzmetin kórsetip, nápaqasyn taýyp júrgen júrgizýshilerdiń narazylyǵyn týǵyzdy. Atpaldaı azamattar tabystan qaǵylyp, kúnkórisimiz qıyndaı ma dep alańdaıdy. Aýyl, aýdan men qala arasynda adam tasyp, kúni-túni tynym tappaıtyn bul júrgizýshiler bir-aq sátte jumyssyz qaldy. Róli oń jaqta, jeti nemese segiz adamǵa arnalǵan keń mashınanyń ıeleri polısıanyń engizgen shekteýine úzildi-kesildi qarsy. Olar kúndelikti tabystan qaǵylyp, otbasyn asyraý qıyndady dep otyr.
«Kredıtte tur kóligim. 4 jyl boldy tólengenine. Men 3-4 kún boldy adamdardy joldan túsirip alamyn. Kredıt prosrochkada jatyr. Bir kúnde toqtatyp tastaýǵa bolmaıdy ǵoı. Biz halyqpyz jumys jasap otyrǵan. Otbasyn asyraý kerek. Ońaı emes bizderge», - deıdi júrgizýshi Arman Baǵytov
Apta basynan beri atyraýlyq polıseıler trassalarǵa shyǵyp, róli oń jaqtaǵy kólikterdi jappaı toqtatýǵa kirisken. Salon ishinde jolaýshylar otyrsa júrgizýshige birden aıyppul salynady. Qajet bolsa temir tulpardy aıyp turaǵyna aparady. Al, tas jolǵa shyǵa almaı, taýy shaǵylǵan azamattar shekteýdi alyp tastaýdy suraıdy.
«Kúndelikti tabatyn 10-15 myń teńge aqsha. 3-4 kún boldy jasyratyn joq. Úıden shyǵa almaı qaldym. Jumys joq úıde jatyrmyz. Qulsary jaqta taksovat eteıin desem taǵy bolmaıdy. Bizge keregi shekteýdi alsyn!», - deıdi júrgizýshi Qanat Quldyrahmanov.
Al, polısıa departamentiniń ókilderi Toıota Álfard, Estıma syndy markaly kólikterdiń jolaýshy tasymaldaýǵa quqyǵy joq deıdi. Oǵan qosa, zańsyz taksı qyzmetin atqaratyn osy mınıvenderdiń deni jyldamdyqty shekten asyryp, erejeni elemeıdi dep otyr.
«Osy jylǵa tas joldarda aýyr jol apattarynan 16 adam qaıtys bolyp otyr. Onyń ishinde qyzyq kórmegen sábı, balalar da bar. Aýdan, eldimekenderde 6-7 adamnan salonǵa salyp alady. Adam ómiri mańyzdy emes, kúndelikti tabysyn oılap ketti. Jol kólik oqıǵasyn aldyn alý maqsatynda túsindirme jumystaryn júrgizip, keńinen qaıtaryp jiberip jatyrmyz», - deıdi Atyraý oblysy polısıa departamenti ákimshilik polısıa basqarmasy bastyǵynyń orynbasary Ádilbek Shahmatov.
