Astanada jedel járdem stansıasynyń basshylary urlyq jasady degen kúdikpen ustaldy, dep habarlaıdy bairaqmedia.kz.
Prokýratýra Astana qalasy boıynsha Ulttyq qaýipsizdik komıteti departamentimen birlesip jymqyrý sqemasynyń jolyn kesti. 2020-2023 jyldar aralyǵynda jedel medısınalyq járdem stansıasynyń búdjet qarajaty urlanǵan.
"Sanıtarlyq avtokóliktiń bólshekteri zańsyz esepten shyǵarylyp, jalǵan qyzmet kórsetý sharttary jasalǵan. Saldarynan jumys isteıtin avtokólikterdiń sany azaıyp, qalǵandary qosalqy bólshekterdi jymqyrý saldarynan paıdalanýdan shyǵarylǵan", - deıdi prokýratýra.
Qazirgi ýaqytta "103" avtoparki tolyǵymen qalpyna keltirildi. Barlyǵy 4 qyzmetker, onyń ishinde 2 orta býyndy basshy men stansıa dırektory ustaldy.
Bul qyzmetkerlerdiń áreketinen memleketke 850 mln teńge asa iri zalal keltirilgen. Qylmystyq is sotqa joldandy.
