«Asar-Ýme» qaıyrymdylyq qory Perızat Qaırattyń shotyna 200 mıllıon teńge aýdarǵan. Bul týraly Astanada qaıyrymdylyqqa bólingen mıllıardtardy jymqyrdy degen Perızat Qaırattyń isine baılanysty sot otyrysy barysynda belgili boldy, dep habarlaıdy bairaqmedia.kz. Sotta Gaza halqyna gýmanıtarlyq kómek kórsetýge qatysty epızod qaralýda. İste jábirlenýshi retinde tanylǵan nyń prezıdenti Asqat Nurmashev sotta eki taraptyń arasyndaǵy áriptestikke baılanysty jaıttardy baıandady.
Taǵy oqyńyz: Perızat Qaırat Baýyrjan Baıbekti de jaýapqa tartýdy talap etti
Asqat Nurmashevtyń aıtýynsha, bul bastama 2023 jyldyń qarashasynda, ıaǵnı Taıaý Shyǵystaǵy jaǵdaı ýshyǵa túskennen keıin paıda bolǵan. Sol kezde áleýmettik jeliler men buqaralyq aqparat quraldarynda Perızat Qaırat basqaratyn qordyń Palestına elshiligimen áriptestik ornatqany jáne Abý-Dabıdegi halyqaralyq gýmanıtarlyq habqa qol jetkize alatyny týraly aqparat taraǵan. Keıin bul málimetti Perızat Qaırattyń ózi «Asar-Ýme» ókilderimen kezdesýde rastaǵan.
«Biz Abý-Dabıge birge bardyq. Halyqaralyq gýmanıtarlyq júk tıeletin qoımany aralap kórdik. Bul – Almatydaǵy qoıma emes, oǵan akredıtasıasyz kirý múmkin emes. Bizge buryn satyp alynǵan júkterdiń sol jerde turǵanyn kórsetti», – dedi Nurmashev sot otyrysynda.
Alaıda onyń aıtýynsha, bul júktiń baryn rastaıtyn eshqandaı resmı qujat usynylmaǵan. Barlyq aqparat tek Perızat Qaırattyń sózine negizdelgen.
Taǵy oqyńyz: Perızat Qaırat isi: sot otyrysynda Gennadıı Golovkınniń aty ataldy
Nurmashevtyń málimetinshe, Abý-Dabıge sapardan jáne Astanada BAÁ men Palestına elshilikteri uıymdastyrǵan sharalarǵa qatysqannan keıin, onyń qory Gaza sektoryna arnap qarajat jınaýdy bastaǵan. Bar bolǵany bes kúnniń ishinde qazaqstandyqtar 293 mıllıon teńge qaıyrymdylyq jasaǵan.
«Biz bul somany transhpen, ıaǵnı ár joly 50 mıllıon teńgeden aýdarýdy josparladyq. Biraq Perızat barlyq aqshany birden aýdarýdy talap etti. Aqyldasa kele, biz 200 mıllıon teńgeni jiberdik. Qalǵan 93 mıllıon teńge tek esep-qısap usynylǵannan keıin aýdarylady dep kelistik», – dedi jábirlenýshi tarap.
Onyń aıtýynsha, eki qor arasynda qaıyrymdylyq baǵytyndaǵy áriptestik týraly kelisim jasalǵan. Alaıda, qarjy aýdarylǵan kezde de, odan keıin de eshqandaı esep berilmegen.
Prokýrordyń «Abý-Dabıdegi qoımadan «BizBirgemiz» qorynyń logotıpi bar júk qoraptaryn kórdińiz be?» degen suraǵyna Nurmashev teris jaýap berdi. Ol sondaı-aq, ol jerden Perızat Qaırattan basqa qor ókilderin kórmegenin atap ótti.
«Perızat Qaırat satyp aldy degen taýarlarǵa qatysty da birde-bir qujat usynylǵan joq. Barlyǵy tek onyń sózine súıenip júzege asty», – dep qosty ol.
Taǵy oqyńyz: Perızat Qaırattyń joǵary bilimi joq bolyp shyqty
Nurmashevtyń sózinshe, Abý-Dabıge sapar shyǵyndaryn Perızat Qaırattyń ózi kótergen.
Ol qor tarapynan usynylǵan barlyq qujattyń jalǵan bolyp shyqqanyn keıin bilgenin aıtty.
