Qazaqstan premer-mınıstri Oljas Bektenov pen onyń orynbasarlaryna elimizdiń qaı jerinde demalǵan unaıtyny týraly suraq qoıyldy, - dep habarlaıdy Massaget.kz.

Búgin úkimette premer-mınıstrdiń BAQ ókilderimen alǵashqy brıfıńi ótip jatyr. Jýrnalıserdiń biri Bektenovten Qazaqstandaǵy týrızmdi damytý máselesin surady. Úkimet basshysy bul salada problemalar baryn moıyndady.

«Kóptegen kýrorttyq aımaqtar, demalys oryndary tek álemdik standarttarǵa emes, qaýipsizdik pen jaılylyqqa qoıylatyn negizgi talaptarǵa da sáıkes kelmeıdi. Bul baǵytta jumys júrgiziledi. Ókinishke qaraı, bizde bir dert bar – árdaıym jaǵajaı maýsymyna daıyn ekeni týraly ádemi esepter keledi. Al is júzinde olaı bolmaı shyǵady. Úkimet tarapynan kemshilik bar ekenin moıyndaımyz», – dedi Oljas Bektenov.

Taǵy oqyńyz: Alakól týrıserdi qabyldaýǵa daıyn emes - Toqaev kinálilerdi jaýapqa tartýdy tapsyrdy

Osydan keıin premer-mınıstrden sońǵy ret Qazaqstanda qashan jáne qaıda demalǵany suraldy. Bektenov 2021 jyldan beri demalys almaǵanyn aıtty.

«Qaı jerde naqty bolǵanymdy dál esime túsire almaı turmyn: Býrabaıda ma, álde Alakólde me... 2021 jyly Alakólde boldym. Sodan beri demalys bolǵan joq, sondyqtan eshqaıda shyqpadym. Eń jaqyny – Býrabaıǵa da baryp úlgermeı júrmin. Jumys saparymen Kenderlide (Mańǵystaý oblysy – esk.), Alakólde boldym, biraq shomylǵan joqpyn, jaǵdaıdy kórip qaıttym», – dedi premer.

Tórt vıse-premer de osy suraqqa jaýap berdi.

«Men de, ókinishke qaraı, kópten beri demalysqa shyqqan joqpyn. Biraq, árıne, ózimizdiń... Pavlodardy, Baıanaýldy qatty jaqsy kóremin. Bul – meniń súıikti jerlerim», – dedi Roman Sklár jýrnalıske qarata.

Vıse-premer Ermek Kósherbaev sońǵy ret demalysta Shyǵys Qazaqstan oblysynyń ákimi bolǵan kezinde shyqqanyn aıtty.

«Byltyr, ákimdikte jumys istep júrgende, 7 kúndik demalys boldy. Sonyń 4 kúni Eýropaǵa bardym, al qalǵan 4 kúni, jeksenbini qosa alǵanda, otbasymmen birge Buqtyrmada (SHQO – esk.), «Prımorsk» demalys aımaǵynda, Úlken Naryn aýdanynda boldym», – dedi Kósherbaev.

Premerdiń orynbasary Serik Jumanǵarın de sońǵy eki jylda demalys almaǵanyn aıtty.

«Sońǵy eki jylda demalǵan joqpyn. Sońǵy ret... A, Jańa jylda. Jańa jyldy Aqkólde ótkizdik. Óte jaqsy jer», – dedi ol.

Qanat Bozymbaev byltyrǵy jazǵy demalysynan sý tasqynyna baılanysty bas tartýǵa týra kelgenin aıtty.

«Iá, byltyr sý tasqynyna baılanysty jazda demalys bolmady, biraq demalys kúnderi Aqtaýda, jyly jaǵajaı aýdanynda eki kún boldym. Al bir demalysym Jetisýdaǵy Alakólde ótti. Keremet demalys boldy», – dedi vıse-premer.