Rejıser Aqan Sataevtyń qyzy Aıısha Sataı áleýmettik jelidegi jazbasynda jeke otbasyna qatysty taraǵan qaýeset pen orynsyz pikirlerge jaýap qatty. Ol adamdardyń sózdi konteksten julyp alyp, asyǵys qorytyndy jasaýyna kóńili qalǵanyn aıtty, dep habarlaıdy bairaqmedia.kz.

«Men adamdardyń tez sheshim shyǵaryp, sózdi konteksten julyp alyp, óz oıynan qosyp, túrli qıalǵa beriletinine qatty qapalanamyn. Ásirese óz ómiri qyzyqsyz kórinetin jandardyń bóten otbasynyń ishki jaǵdaıyn talqylaýǵa ýaqyty bary tańǵaldyrady», – dep jazdy ol.

Aııshanyń aıtýynsha, ol bala kezinen arandatýǵa jaýap bermeýge daǵdylanǵan. Alaıda ata-anasynyń ar-namysyna til tıgizilgende únsiz qalý múmkin emes ekenin atap ótti.

«Men eshqashan dáleldeýmen aınalysqan emespin. Biraq ákem men anamnyń abyroıyna nuqsan keltirilgenin tynysh baqylap otyra almaımyn», – deıdi ol.

Jazbada Aıısha anasyna qatysty aıtylyp júrgen áńgimelerge de naqty jaýap berdi.

«Anamdy eshkim “tastap ketken” joq. Oǵan ózi tańdaǵan tórt bólmeli páter syıǵa tartyldy. Ol – eresek, derbes adam jáne qaı jerde ómir súrýdi ózi sheshedi. Eshbir eresek adamdy kúshtep ustap turý múmkin emes», – dep jazdy ol.

Sondaı-aq ata-anasynyń ajyrasýyna qaramastan, anasyna degen mahabbat pen kúndelikti qarym-qatynas úzilmegenin aıtty.

«Bizdiń aramyzdaǵy baılanys ajyrasýdan da, qashyqtyqtan da úzilgen joq», – dedi Aıısha.

Ákesi men anasynyń arasyndaǵy ózara qurmetke de toqtalǵan ol ákesiniń bir sózin erekshe atap ótti.

«Ákem maǵan: “Eshqashan óz anań týraly jaman sóz aıtpa. Ol – seniń anań, qandaı jaǵdaı bolsa da”, – degen edi. Bul sóz meniń jadymda máńgi qaldy», – dep jazdy ol.

Aıısha Sataı eresek adamdardyń jeke qarym-qatynasyna bógde adamdardyń aralasýy orynsyz ekenin aıtty.

«Ata-analar óz ómirin ózi súredi. Balalarǵa tek qabyldap, jaqsy kórý ǵana qalady», – dedi ol.

Sonymen qatar jelidegi «qutqarýshy sındromymen» ómir súretinderge úndeý jasady.

«Bóten otbasyn emes, óz jaqyndaryńyzdy “qutqaryńyzdar”. Olarǵa mahabbat pen ýaqyt bólińizder», – dep jazdy Aıısha.

Jazbasynyń sońynda ol din men adamnyń dúnıetanymyn talqylaýdyń ádepke jat ekenin de atap ótti.

«Din – adamnyń jeke tańdaýy. Ony talqylaý da, aıyptaý da durys emes. Aldymen meıirimdi, ádiletti bolyńyzdar», – dep túıindedi ol.