Áleýmettik jeliler men messendjerlerde Almaty qalasyndaǵy birqatar mektepte terorıstik aktiler daıyndalyp jatqany jóninde jalǵan aqparat taralyp jatyr. Osyǵan baılanysty qalalyq PD málimdeme jasady, dep habarlaıdy bairaqmedia.kz. 

"Resmı túrde habarlaımyz: atalǵan málimet shyndyqqa sáıkes kelmeıdi jáne feık bolyp tabylady.

Qazirgi ýaqytta qaladaǵy bilim berý uıymdaryndaǵy ahýal tolyq baqylaýda. Polısıa jáne ózge de jedel qyzmetter kúsheıtilgen rejımde jumys isteýde, balalar men pedagogtardyń qaýipsizdigin qamtamasyz etý úshin barlyq qajetti shara qabyldandy.

Jalǵan aqparatty taratý faktisi boıynsha jedel-izdestirý is-sharalary bastaldy. Feık habarlamanyń avtory men taralý kózi anyqtalýda. Oǵan qatysy bar tulǵalar qoldanystaǵy zańnamaǵa sáıkes jaýapkershilikke tartylady", - delingen habarlamada.

Polısıa azamattardy sabyr saqtaýǵa, dúrbeleńge boı aldyrmaýǵa jáne tek resmı aqparat kózderine – memlekettik organdar men quqyq qorǵaý qurylymdarynyń habarlamalaryna ǵana senýge shaqyrady.

"Ásirese balalardyń qaýipsizdigine qatysty kórineý jalǵan aqparat taratý – aýyr quqyq buzýshylyq bolyp sanalady jáne zańmen qatań jaýapkershilikke ákep soǵady. Tekserilmegen habarlamalardy taratpaýǵa, qaıta joldamaýǵa shaqyramyz", - delingen PD habarlamasynda.