2026 jyly Almatyda bokstan stýdentter arasynda álem chempıonaty ótýi múmkin. Álem chempıonatyn Qazaqstanda ótkizýdi Halyqaralyq ýnıversıtetter sporty federasıasynyń ózi usynyp otyr. Bul týraly Almatyda ótken baspasóz otyrysynda Qazaqstan ulttyq stýdentter sport odaǵynyń Prezıdenti Qaırat Zakıránov aıtty, dep habarlaıdy bairaqmedia.kz
28-qarasha kúni Qytaıdyń Makao qalasynda Azıa ýnıversıtettik sport federasıasynyń Bas Assambleıasy ótti. Bul jıynǵa Qazaqstan ulttyq stýdentter sport odaǵynyń Prezıdenti Qaırat Zakıránov arnaıy qatysqan. İs-shara aıasynda óńirdegi ýnıversıtettik sportty damytýǵa qatysty negizgi máseleler, yntymaqtastyq strategıalary jáne Ortalyq Azıadaǵy stýdenttik sport jobalaryn ilgeriletýge baǵyttalǵan jańa bastamalar talqylanypty.
Bokstan stýdentter arasynda Álem chempıonatyn ótkizý týraly usynys – Halyqaralyq ýnıversıtetter sporty federasıasy men basqa da álemdik uıymdardyń elimizge degen zor senimi dep bilemiz. Halyqaralyq ýnıversıtetter sporty federasıasynyń Prezıdenti Leons Eder Qazaqstannyń halyqaralyq iri jarystardy uıymdastyrýda tájirıbesi mol ekenin atap ótti, - dedi Qazaqstan ulttyq stýdentter sport odaǵynyń Prezıdenti Qaırat Zakıránov.
Bokstan stýdentter arasyndaǵy Álem chempıonatyn otandasymyz Gennadıı Golovkın basqaratyn WORLD Boxing halyqaralyq uıymnyń qoldaýymen ótkizýi múmkindigi jan-jaqty qarastyrylyp jatyr. Bul - jarystyń álemdik arenadaǵy bedelin arttyryp, eń myqty sportshylardyń qyzyǵýshylyǵyn oıatady.
Bul shara bizdiń boksshylardyń kelesi Olımpıada oıyndarynda kemi bir altyn alýyna septigin tıgizedi. Bilesizder, Parıjden boksshylarymyz altynsyz oraldy. Buǵan deıingi Olımpıadalarda bizdi boks qutqaryp kelgen edi. Qazir biz Gennadıı Golovkınniń komandasymen kelissóz júrgizip jatyrmyz, - dedi Qaırat Zakıránov.
Qalada bokstan stýdentter arasyndaǵy álem chempıonatyn ótkizý úshin qosymsha sporttyq nysandar salýdyń qajet joq eken.
Buǵan qosa, elimizde stýdentter arasynda Combat boıynsha Álem chempıonatyn ótkizýge qatysty jumystar júrgizilip jatyr. Aýqymdy sporttyq shara 2028 jyly Astana qalasynda uıymdastyrylmaq.
2028 jyly osy chempıonatty ótkizgimiz kelip otyr. Ári onyń baǵdarlamasyna qazaq kúresin qosý josparda bar. Buǵan qosa, karate men jaýyngerlik sambo syndy sport túrlerin qosamyz, - dedi Qazaqstan ulttyq stýdentter sport odaǵynyń Prezıdenti.
Sondaı-aq Halyqaralyq ýnıversıtetter sporty federasıasy 2029 jylǵy Búkilálemdik qysqy Ýnıversıada oıyndaryn da Qazaqstanda ekinshi ret ótkizý máselesin qozǵaǵan.
2017 jyly elimizde ótken Ýnıversıadanyń óte joǵary deńgeıde uıymdastyrylǵany týraly pikirler kóp boldy. Zertteý qorytyndysyna sáıkes, osy sharadan keıin sportpen aınalysatyn stýdentter sany 40 paıyzdan 75 paıyzǵa bir-aq ósken. Iaǵnı, Ýnıversıada talaı jastyń sportqa degen qyzyǵýshylyǵyn oıatqan, - dedi Qaırat Zakıránov.
Sondyqtan, Búkilálemdik qysqy Ýnıversıada oıyndaryn ekinshi márte elimizde ótkizýdiń mańyzy zor.
