Almaty oblysynda tehnıkalyq jáne kásiptik bilim berý júıesin halyqaralyq deńgeıge kóterý baǵytynda júıeli jumystar júrgizilip jatyr. Óńir kolejderi shet memleketterdiń jetekshi bilim berý uıymdarymen yntymaqtastyq ornatyp, tájirıbe almasý men bilikti kadrlar daıarlaý isin jańa deńgeıge shyǵarýda, dep habarlaıdy bairaqmedia.kz
Qazirgi tańda Almaty oblysynyń kolejderi Qytaı, Ońtústik Koreıa, Fransıa, Túrkıa, Ózbekstan jáne Qyrǵyzstan elderiniń birqatar oqý oryndarymen yntymaqtastyq týraly kelisimsharttar jasaǵan.
Atap aıtqanda, Túrkıanyń Antalıa qalasyndaǵy Mehmet Zekı Baldjy joǵary mektebi (týrızm jáne qonaq úı bıznesi), Fransıanyń Parıj qalasyndaǵy Gııoma Tırel lıseıi jáne Elıza Lemone lıseıi oblys kolejderimen birlesken jobalardy iske asyrýǵa nıet bildirgen.
Sonymen qatar, Qytaıdyń Sıan qalasyndaǵy kýlınarlyq kolejben, Fınlándıadaǵy ECEDU kásiptik koleji, Qyrǵyz Respýblıkasyndaǵy S. Ibraımov atyndaǵy agrotehnıkalyq kolej, Qytaıdyń Chýnsın qalasyndaǵy oqý oryndarymen jáne Koreıanyń OFECO.LTD kompanıasymen yntymaqtastyq jóninde memorandýmdarǵa qol qoıylǵan.
2024–2025 oqý jylynda Almaty oblysynan segiz pedagog shet memleketterde taǵylymdamadan ótti. Onyń ishinde bes pedagog Túrkıada, al úsh pedagog Fransıada kásibı tájirıbe jınaqtaǵan.
Kolej oqytýshylarynyń aıtýynsha, halyqaralyq tájirıbe kásibı damýǵa tyń serpin beredi.
Shetelde taǵylymdamadan ótý bizge zamanaýı oqytý ádisterin meńgerýge, óndiris pen bilimniń ózara baılanysyn tereń túsinýge múmkindik berdi. Bul tájirıbe stýdenttermen jumys isteý sapasyn arttyrýǵa tikeleı áser etedi, – deıdi Almaty oblysy kolejiniń basshysy Baqytgúl Kishibaeva.
Al bilim salasyna jaýapty mekeme ókilderi bul baǵyttaǵy jumystyń aldaǵy ýaqytta da jalǵasatynyn atap ótti.
Halyqaralyq áriptestik – tehnıkalyq jáne kásiptik bilim berýdi jańǵyrtýdyń mańyzdy tetigi. Biz kolejderdiń álemdik standarttarǵa saı damýyna jáne eńbek naryǵyna suranysqa ıe mamandar daıarlaýyna basymdyq berip otyrmyz, – deıdi oblystyq bilim basqarmasynyń ókili Kenjegúl Dúısentaeva.
Budan bólek, Qytaı – Ortalyq Azıa elderi arasyndaǵy birlesken jobalar aıasynda aýyl sharýashylyǵy men tehnıkalyq mamandyqtar boıynsha kadr daıarlaıtyn jeti kolej dırektory jáne óndiristik oqytý jónindegi bir dırektordyń orynbasary 2025 jylǵy 14–24 sáýir aralyǵynda Qytaıdyń Chýnsın qalasynda oqý kýrsynan ótti. Nátıjesinde 49 yntymaqtastyq memorandýmyna qol qoıyldy.
Mamandardyń aıtýynsha, bul bastamalar Almaty oblysy kolejderiniń halyqaralyq standarttarǵa saı damýyna, pedagogtardyń kásibı deńgeıin arttyrýǵa jáne eńbek naryǵyna qajetti bilikti mamandar daıarlaý sapasyn kúsheıtýge múmkindik beredi.
