Qazaqstan ulttyq telearnasynyń Tansholpan baǵdarlamasynda qonaq bolǵan ánshi Ómirqul Aınıazov otbasy qundylyqtary men bala tárbıesine qatysty oıymen bólisti, dep habarlaıdy bairaqmedia.kz.

Baǵdarlama barysynda ol balasyn ata-ájesiniń qolyna tabystaǵanyn, alaıda bul sheshimge qatysty óz ustanymy baryn jasyrmady. Óner ıesi ózi de bala kúninde ata-áje tárbıesin kórgenin aıtyp ótti. Aıtýynsha, bastaýysh synypty aıaqtaǵanǵa deıin ata-ájesiniń janynda ósip, keıin ǵana ata-anasynyń qolyna barǵan.

«Eki jaqqa da erkelep óstim. Biraq bir ereksheligi óz áke-sheshemdi “aǵa, jeńge” dep atadym. Sol sezimniń qandaı ekenin ishim jaqsy biledi. Sondyqtan óz balamdy ata-anama bergende bir-aq talap qoıdym. Ol meni ákesi retinde tanýy kerek. Men kelgende “áke” dep aldymnan shyǵýy tıis», — dedi ánshi.

Ómirqul Aınıazovtyń bul oıy áleýmettik jelide keńinen talqylandy. Birqatar oqyrman onyń sózinen bala kezdegi ishki saǵynysh pen psıhologıalyq áserdi ańǵarǵanyn jazsa, endi bireýleri ata-áje tárbıesiniń oń qyrlaryn atap ótti.

«Travma degen osy. Óz ata-anasyn izdeý, saǵyný», «Burynǵy zaman solaı boldy, qazir bári basqasha», «Ata-áje tárbıesi balany kópshil, meıirimdi etedi», «Qazirgi “travma” degendi qoldan shyǵaryp alǵandaımyz», — dep pikir qaldyrdy jeli qoldanýshylary.

Jalpy kópshilik ánshiniń kózqarasyna túsinistikpen qarap, balanyń kimniń qolynda óskenine qaramastan, áke men shesheniń orny men rólin anyq sezinýi asa mańyzdy ekenin atap ótti.