Jetisý oblysynda kúıeýi atpen súırep, ajal qushqan Aızatqa qatysty otbasylyq dosy pikir bildirdi, dep jazady Bairaqmedia.kz Democrat.kz-ke silteme jasap.

"Aızatty da, joldasyn da jaqsy tanımyz. Óte jaqyn aralastyq. Qurdastar bolyp, bir-birimizge barys-kelisimiz jaqsy edi. Birneshe kúnnen beri "Aızattyń ózinen de kiná bolǵan" degenge saıatyn pikirler jazylýda. Aıtqym kelgeni, ne bolyp, ne qoıǵanyn ázirge eshkim bilmeıdi. Marqumnyń artynan ondaı jaman sóz aıtpaıyq", - deıdi ol.

Onyń aıtýynsha, Aızat ta, kúıeýi de jap-jaqsy adamdar bolǵan.

"Ekeýiniń arasynda áldebir arazdyq, urys-keris bolǵanyn aralasyp júrgen osy 3 jylda kórgen emespiz. Aızattyń óte jaqsy kelinshek bolǵanyn kózimiz kórdi. Otbasylyq dostarymyz boldy. Aıbar bálkim birdeńe ishti me, shekti me, kim bilsin. Kózi baılanyp qaldy ma, bilmeımin. Qalaı desek te, qylmys jasalǵan bolsa, árkim óz jazasyn alady dep senemin. Qalaı bolǵanda da, dostarymyzdyń birin ólimge, birin túrmege qımaımyz. Alaıda ádildik ornyn tabady dep senemiz", - degen Dana Qasymova jurtty oqıǵanyń naqty shyndyǵyn bilmeı pikir jazbaýǵa shaqyrdy.