Shymkent qalasy ákiminiń orynbasary Rýslan Berdenov sotqa nege qatysa almaǵanyn aıtyp, ózine qastandyq jasaǵan Ernar Jıembaıdyń sottaǵy sózderine jaýap berdi, dep habarlaıdy bairaqmedia.kz.
Bul týraly ol óziniń Facebook-tegi paraqshasynda jazdy.
«Qazirgi ýaqytta densaýlyǵyma jáne bes oq jaraqatynan keıingi ońaltý kezeńinen ótip jatqanyma baılanysty sot otyrystaryna jeke qatysýyma múmkindik joq. Alaıda, sot prosesin jáne oǵan qatysty aqparattyq keńistiktegi ahýaldy muqıat baqylap otyrmyn. Sotta jaýapker Jıenbaı tarapynan aıtylyp jatqan málimdemelerge únsiz qalý múmkin emes. Bul tek qana shantaj jáne qysym kórsetý áreketi. Sońǵy ret men ony sol kúni, dál ózi ańshy myltyǵynan atyp ketken keshte kórdim. Odan keıin bizde eshqandaı baılanys bolǵan joq.
Keıinirek ol ókilderimen birge meniń qorǵaýshylarymmen baılanys ornatýǵa tyrysyp, «dostasýdy» usyndy. Keshirim berilse, shý kótermeımiz dedi, al bas tartqan jaǵdaıda «aqparattyq jarylys» jasaımyz dep ses kórsetti. Tipti, aıyptalýshynyń ákesi ózin-ózi órteıdi degen málimdeme jasalatynyn aıtty. Muny men tikeleı qysym dep baǵalaımyn. Men qandaı da bir qysym men arandatýǵa jol bermedim.
Bastapqy ustanymym ózgergen joq. Qaqtyǵystyń túp-tórkini - kásibı, qyzmettik sıpatta. Jaýapker kelisim aıasyndaǵy jumysyn adal atqarǵysy kelmedi, esep berýden jaltardy. Men tek ashyqtyq pen mindettemelerdiń oryndalýyn talap ettim.
Al qoǵam nazaryn «qyzǵanysh», «jeke qatynas», «jubaıy» sekildi jalǵan sebepterge burý - manıpýlásıa, shyndyqtan alystatý. Men onyń jubaıyn da, otbasyn da tanymaımyn. Ol men úshin tek merdiger bolatyn.
Budan da soraqysy – búginde bul jalǵan málimdemelerge qala ákimine qatysty tustardy da qosyp jatyr. Bul taǵy da istiń aqıqatqa emes, qysym kórsetý men bedelge nuqsan keltirýge baǵyttalǵan óreskel manıpýlásıa ekenin dáleldeıdi. Men mundaı málimdemelerdi úzildi-kesildi joqqa shyǵaramyn jáne olardy moıyndamaımyn.
Meniń ustanymym - ózgermeıdi. Depýtattyq ókilet merzimi aıaqtalǵan soń da, memleketke adal qyzmet etý jolynan taıǵan joqpyn. Sońǵy úsh jylymdy osy jolǵa arnadym. Qala ákiminiń shaqyrýymen ákimdikke kelip, ashyq, adal jumys isteýge, halyqqa shynaıy kómek kórsetýge kúsh saldym.
Men saılaýǵa baryp, elimdi jaqsartqym keldi. Meniń artymda elimizge, ózgeristerge senetin jastar tur. Bul - úlken jaýapkershilik, men ony sezinemin. Ákimdiktegi jumysym da osy senimdi aqtaýǵa baǵyttalǵan. Maǵan qarsy aıtylǵan jala, japqan jalǵan aıyptar meni jolymnan taıdyrmaıdy. Áli de ádiletti, ashyq sotqa senemin. Búginde denemde ańshy myltyǵynyń 60-tan kóp qorǵasyn oqtary áli de bar. Bul qujatpen rastalǵan fakt. Sottaǵy joqtyǵymdy, únsizdigimdi ózderine tıimdi jaǵyna buryp, qoǵamdyq pikirmen oınaǵysy keletinder bar. Biraq únsizdik kelisim degen sóz emes. Men ádiletti sotty kútip otyrmyn», dep jazdy ol.
