Shymkentte qala ákiminiń orynbasary Rýslan Berdenovke qastandyq jasaý isi boıynsha sot prosesi bastaldy. Sottalýshy Ernar Jıenbaı sheneýnikke shabýyl jasaý sebebin aıtty, dep habarlaıdy bairaqmedia.kz.

Tengrinews.kz habarlaýynsha, 6 tamyz kúni basty sot otyrysy aıyptalýshyny tergeýden bastaldy. Jıenbaıdyń aıtýynsha, janjaldyń sebebi – jumysqa qatysty kelispeýshilik emes, qyzǵanysh bolǵan.

"Bul sózimdi halyq estisin deımin. Bul jaǵdaıdyń jumysqa esh qatysy joq. Bári qyzǵanyshtan shyqqan", – dedi Jıenbaı.

Sottaǵy jaýap alý kezinde Ernar Jıenbaı óz otbasy týraly aıtyp, áleýmettik jelilerde taraǵan qaýesetterdi joqqa shyǵarýǵa tyrysty.

"Altynshy synyptan birge oqydyq – meniń adal jarym, súıikti áıelim. Men ony eshqashan bóten bireýmen sóılesip turǵanyn kórgen emespin. Ol jaqsy otbasynan shyqqan, tárbıeli qyz. Áleýmettik jelilerde jazyp jatqandaı jeńil minezdi emes", – dedi sottalýshy.

Ol úlken ulynyń aýtızmmen aýyratynyn aıtty. Erli-zaıyptylar dál osyndaı dıagnozy bar bala tárbıelep otyrǵan otbasymen bir kóshede turǵan. Jıenbaıdyń aıtýynsha, bul otbasy Rýslan Berdenovtyń týystary bolǵan jáne áıeli olarmen jıi aralasyp damytý sabaqtaryna birge barǵan.

"Áıelim Berdenovpen dastarhandas bolǵan. Sol jerlerde "qara kasa" degen oıyn oınaǵan", – dedi aıyptalýshy.

Jıenbaıdyń aıtýynsha birshama ýaqyttan keıin , áıeliniń telefonyna Rýslan Berdenovten habarlama kelgen.

"Áıelimniń telefonyna qarasam, Rýslan Berdenov oǵan laık basyp, "Sen ádemisiń" dep jazǵan. Men budan artyq eshteńe oılaǵan joqpyn. Ondaı sózderdi men de ápkelerime aıtam", – dedi ol.

Sottalýshynyń aıtýynsha, boljaldy qastandyq jasalardan bir kún buryn ol Berdenovke qabyldaýǵa barmaq bolǵan. Áıelinen kıimderin daıyndap qoıýyn suraǵan. Biraq úıge kelgende áıeli úlgermegenin, al kóıleginiń sheti kúıip qalǵanyn baıqaǵan.

"Men asyǵyp turdym. Sol kezde ol maǵan Rýslan Berdenov qalaı kıinetinin aıta bastady. Sóıtsem, oǵan 5 mıllıon turatyn kostúmder unaıdy eken. Bul da meniń qastandyq jasaýǵa barýyma sebepterdiń biri bolǵan shyǵar", – dedi Jıenbaı sotta.