Balqashtaǵy eldi dúrliktirgen jaǵdaıǵa qatysty tyń derek shyqty. Segiz jastaǵy balany aıaýsyz uryp-soǵyp, qınaǵan delingen kúdiktiniń áıeli kópshilikke oqıǵanyń qalaı bolǵanyn baıandap berdi, dep habarlaıdy bairaqmedia.kz.

«Men Almas Basymbekovtyń áıeli, 8 jastaǵy Erbolattyń apaıymyn. Oılaryńyzdy san-saqqa jiermeý úshin bárin basynan bastap aıtyp bereıin. Erbolattyń anasy biz suramasaq ta ony jaz saıyn bizge jiberedi. Atasyn, ıaǵnı meniń ákemdi syltaýratyp, merekelerde de jiberip otyrady. Ákem vahtalyq ádispen 15 kún jumys istep, 15 kún demalady. Qyzmetke ketken kezde Erbolatty bizdiń qaraýymyzǵa tapsyryp ketedi. Ózimiz eki balany tárbıelep otyrǵan otbasymyz, men de jubaıym da jumys isteımiz. Kúıeýim óz balasyna qaraǵandaı qaraıdy, tamaǵy toq, kóılegi kók. Ol meniń týǵan baýyrymnyń uly. Men onyń ekinshi anasy sekildi adammyn», — deıdi kúdiktiniń áıeli.

Vıdeodaǵy áıeldiń aıtýynsha, 8 jastaǵy Erbolatty anasy naǵashy atasynyń úıine 5 jyl boıy jiberip kelgen. Sol ýaqyt aralyǵynda oǵan eshkim tıispegen.

«Oqıǵa bolǵan kúni men jumysta edim. Al jubaıym 3 balaǵa: meniń jasqa tolǵan ulym, 4 jasar qyzym jáne Erbolatty qarap, úıde bolǵan. Túski tamaqtaryn berip, kishi ulymdy uıyqtatyp, eki balany shýlamasyn dep qoldaryna planshet berip, ózi sharýalarmen aınalysyp júrgen. Bir kezde ul men qyz otyrǵan bólmeniń ashyq turǵan esiginen sumdyq kóriniske kýá bolady. Erbolat qaryndasyn sheshindirip, butyn ashyp, ózi ish kıimin sheship, ústinde jatqan. Shoshyp ketken kúıeýim Erbolatty ıterip jiberip, qyzyn teksere bastaǵan. Qan joq pa dep qaraǵan. Ol uldy urmaı turyp, «ne istediń» dep suraǵan, bala «bir ret ıterdim» dep jaýap bergen. Odan keıin jubaıym ne istep, ne qoıǵanyn bilmeıdi», — dedi áıel.

Kúdiktiniń áıeli kúıeýi bárin afektti shok jaǵdaıynda istegenin atap ótti.

Ol «Qazaqmys» qyzmetkeriniń áıeli 8 jastaǵy balanyń anasynyń «denesin kúıdirdi, tıyn jutqyzdy, saýsaqtaryn syndyrdy» degen sózderi jalǵan ekenin málimdedi.

«Qazir saraptamany kútip otyrmyz, kúıeýim jaýapkershilikten qashpaıdy, ol qazir tergeý ızolátorynda otyr. Balanyń saýsaqtaryn syndyrdy degen ótirik, múmkin urǵan kezde zaqym kelgen shyǵar. Otbasymyzdyń basynan ótkerip otyrǵan jaǵdaıdy, jaýyma da tilemeımin. Biz qarapaıym ǵana otbasymyz. Vıdeony taratyńyzdar», — dedi áıel.

Eske sala keteıik, «Qazaqmys» qyzmetkeri 8 jastaǵy ul balany uryp-soǵyp, qınaǵany úshin kúdikke ilingen edi.