AQSH prezıdenti Donald Tramp Ilon Masktyń shyǵyndar men salyqtarǵa qatysty zań jobasyna aıtqan synyna jaýap berip, kásipkerge «dúkenińdi jap ta, Ońtústik Afrıkaǵa úıińe qaıt» dep keńes berdi, dep jazady qazaq.today.
«Elektr kólikteri keremet, biraq barlyǵyn ony paıdalanýǵa májbúrleý durys emes. Ilon adamzat tarıhynda eń kóp sýbsıdıa alǵan adam bolýy múmkin. Eger sol sýbsıdıalar bolmasa, bálkim, ol áldeqashan dúkenin jaýyp, Ońtústik Afrıkaǵa qaıtyp keter edi», - dep jazdy Tramp Truth Social áleýmettik jelisinde.
Sonymen qatar, Tramp buryn Mask basqarǵan Memlekettik tıimdilik departamentin (DOGE) tekserýge shaqyrdy.
«Zymyrandar, spýtnıkter men elektromobılder óndirisin toqtatsaq, el retinde úlken qarjy únemder edik. Bálkim, DOGE osy máseleni muqıat qarap shyǵýy kerek shyǵar. Bul arqyly mıllıardtaǵan qarjyny únemdeýge bolady», — dedi AQSH prezıdenti.
Zań jobasy týraly ne belgili?
Buǵan deıin AQSH Senaty Tramptyń ózi «bir úlken jáne ádemi zań» dep ataǵan (One Big Beautiful Bill) reformalar paketin ilgeriletýge daýys bergen. Bul zań jobasynda aýqymdy salyq jeńildikteri men memlekettik shyǵyndardy kóbeıtý qarastyrylǵan. Qujatta shamamen 4 trıllıon dollar salyqtyq jeńildikterdi uzartý, shaıpulǵa salynatyn salyqty joıý, Aq úıdiń jappaı deportasıalaý naýqanyna qarjy bólý jáne «Altyn kúmbez» (Golden Dome) dep atalatyn zymyranǵa qarsy qorǵanys júıesin salý sekildi Tramptyń saılaýaldy ýádelerin oryndaý josparlanǵan. Endi Senat osy sharalar paketin túpkilikti daýysqa salýy tıis.
Tramp pen Mask arasyndaǵy teketires
Ilon Mask Tramptyń «úlken, ádemi zań jobasyn» birneshe ret synǵa alyp, ony «aqylǵa qonymsyz» jáne Respýblıkalyq partıa úshin «saıası óz-ózine qol jumsaý» dep ataǵan. Artynsha Mask AQSH prezıdentinen keshirim suraǵanymen, onyń sońǵy jazbasyna qaraǵanda, bul zań jobasy jaıly pikirin ózgertken joq.
«Bul zań jobasyna jumsalatyn essiz shyǵyndar men memlekettik qaryz sheginiń bes trıllıon dollarǵa deıin ulǵaıýy bizdiń bir partıaly - SHOSHQALAR PARTIASY bar elde ómir súrip jatqanymyzdy kórsetedi! Endi halyqty shyn máninde oılaıtyn jańa saıası partıa quratyn ýaqyt keldi», - dep jazdy Mask X (burynǵy Twitter) jelisinde.
