Әнші Димаш Құдайберген Ақтаудағы қайғылы оқиға кезінде қаза тапқан жас әскери қызметшілердің отбасылары мен жақындарына көңіл айтты. Өнер иесі әлеуметтік желідегі жазбасында 18-19 жастағы сарбаздардың қазасы қабырғасын қайыстырғанын жеткізді, деп хабарлады Вairaqmedia.kz.
Димаш Құдайберген өмір жолын енді бастаған жастардың қазасын ауыр қабылдағанын жазды.
«Біздің Ақтауда көз жұмған 18-19 жасар інілерімді қимай, жүрегім ауырып, айтуға сөз таба алмай отырмын. Балалық кезеңнен енді ғана шығып келе жатқан кезде жап-жас ғұмырлардың осылайша үзіліп кеткені…» – деді әнші.
Ол қаза тапқан сарбаздардың ата-аналарына, туған-туыстары мен жақындарына шын жүректен көңіл айтып, оларға сабыр мен күш тіледі.
«Інілерімнің жатқан жері жайлы, топырағы торқа болсын. Жандары жәннатта болсын. Ешбір ата-ана баласының артында қалмасын… Елімізде мұндай қасірет енді қайталанбасын», – деп жазды Димаш.
Өнер иесі жазбасын «Қош болыңдар, бауырларым…» деген сөздермен аяқтады.
Еске салайық, Каспий теңізіндегі әскери оқу-жаттығу кезінде әскери қызметшілер қаза тапты. Қайғылы оқиғаға байланысты Қазақстанда 25 қыркүйек жалпыұлттық аза тұту күні болып жарияланды.
