Алматыда 34 жастағы Феруза Жүкенованың қатыгездікпен өлтірілуіне қатысты сот процесі аяқталуға жақын. Бұл туралы Bairaqmedia.kz КТК телеарнасына сілтеме жасап хабарлайды.
Мемлекеттік айыптаушы бұрынғы полиция қызметкері Серік Нәкімовті 18 жылға бас бостандығынан айыруды сұрады. Тергеу нұсқасына сәйкес, отбасылық жанжал кезінде ер адам азаматтық некедегі әйеліне бірнеше рет пышақ сұққан. Марқұмның туыстары оның денесінде 39 пышақ жарақаты болғанын айтады. Олардың сөзінше, қайғылы оқиға балалардың көз алдында болған.
Оқиғадан кейін айыпталушы өз-өзіне қол жұмсамақ болған, алайда аман қалған. Сотта ол кінәсін мойындағанымен, қорғаушы тарап қылмыс қатты жан күйзелісі (аффект) жағдайында жасалғанын алға тартып отыр. Серік Нәкімов полицияда 15 жыл қызмет атқарған, кейін теріс себептермен жұмыстан шығарылған. Ал марқұм Феруза Жүкенова балабақша меңгерушісі болып жұмыс істеген. Қайғылы оқиғадан кейін үш бала анасыз қалды. Марқұмның туыстары айыпталушыға қатаң жаза тағайындауды және моральдық зиян үшін 100 миллион теңге өтемақы өндіруді талап етіп отыр.
