Түркістан қаласының әкімі Әзімбек Пазылбекұлы Яссы секторының тұрғындарымен кездесті деп хабарлайды bairaqmedia.kz

Кездесу барысында қала әкімі сектор аумағында атқарылған жұмыстар мен 2024 жылы көтерілген мәселелердің орындалу барысы туралы баяндама жасап, алдағы кезеңге жоспарланған жобалармен таныстырды.

Жергілікті тұрғындар кәріз желілері мен жол сапасы, қоғамдық көлік қатынасы, жарықтандыру және интернет қолжетімділігі секілді өзекті мәселелерді көтерді. Әрі нақты ұсыныстарын жеткізді. Әзімбек Пазылбекұлы барлық сұрақтарға заң аясында нақты жауап берді. Тіпті, кейбір мәселені сол жерде шешіп, жауапты сала басшыларына нақты тапсырмалар жүктеді.

Яссы секторында тұрғындар тарапынан 20 мәселе көтерілді. Солардың 7-еуі бірден нақты шешімін тауып, қалған 13 мәселе қолданыстағы заңнама талаптарына сәйкес түсіндірілді.

Әзімбек Пазылбекұлы өз сөзінде Түркістан қаласының даму динамикасына тоқталып, мемлекеттік бағдарламалар аясында жүзеге асып жатқан инфрақұрылымдық жобалармен таныстырып, тұрғындардың белсенділігі мен ұсыныс-пікірлерінің маңыздылығын атап өтті.

Сонымен қатар, тұрғындарды қаланың тазалығы мен қауіпсіздігін бірлесе қамтамасыз етуге шақырды. Кездесу соңында қала басшысы бастаған сала басшылары тұрғындарды жеке мәселелері бойынша қабылдап, арыз-шағымдарын тыңдады.

Айта кетейік, қала әкімінің халықпен кездесуі мына күндері өтеді:

27 мамыр күні сағат 15:00 - Бірлік секторында орналасқан №27 мектепте;

28 мамыр күні сағат 10:00 - 1-ші мөлтек ауданында орналасқан №4 мектепте; 15:00 - Сандыбаев көшесіндегі №18 мектепте;

29 мамыр күні сағат 10:00 - Мәдени рухани орталықта орналасқан «Ұлы-дала орталығы» кешенінде; 15:00 - ӘІО-ғы 9-шы көше бойында орналасқан №33 мектепте;