Мәжіліс депутаты Ермұрат Бапи Бас прокурор Берік Асыловқа сауал жолдап, Атырауда Қазақстанның Мемлекеттік туына арабша жазу мен қылыш бейнесін салған адамдардың артында тұрған арандатушыларды анықтап, жазаға тартуды сұрады, деп хабарлайды Bairaqmedia.kz.

Депутаттың айтуынша, бұл жағдай қоғамда үлкен резонанс тудырып, азаматтардың алаңдаушылығына әкелді.

Бет-аузын тұмшалап, қара жамылған төрт әйел мұз айдынында өткен жарыс кезінде Мемлекеттік туды ұстап түскен сурет әлеуметтік желілерге кеңінен тарап кетті. Олардың қолындағы мемлекеттік тудың бетіне араб жазуы мен араби қылыштың сұлба-суреті салынған. Мұнда біздің назарымызды аударған — көк тудағы араб қарпіндегі жазудың өте сапалы түрде, арнайы баспа құралымен таңбалануы. Демек, бұл жай ғана тұрмыстық бұзақылық, әдепсіз шектен шығушылық қана емес. Бұл – біздің қоғамымызға, мемлекеттігімізге, ұлттық дәстүріміз бен бірегейлігімізге жасалған ашық және нақақ қарсылық, – деді Ермұрат Бапи.

Бұл ретте депутат Туға жазу жазғандарды ғана емес, бұл әрекетті ұйымдастырған адамдарды анықтап, жауапқа тарту қажет екенін айтты. Сонымен қатар, депутат стандартқа сай емес мемлекеттік рәміздерді сатылымға шығарған сауда орындарына да шара қолдану керектігін жеткізді.

Оның айтуынша, Wildberries Russ маркетплейсінде осыған ұқсас тулар 5000 теңгеден сатылып жатыр. Осыған байланысты құқық қорғау органдары жалған мемлекеттік рәміздерді дайындаушылар мен таратушыларды анықтап, оларды сатылымнан алып тастау үшін шара қабылдауға тиіс.