Әлеуметтік желілерде күтпеген жерден АҚШ президенті Дональд Трамптың қайтыс болғаны туралы хабар тарап, бүкіл интернетті шулатты. #TrumpIsDead хэштегі X (Twitter) желісінде бірден трендке шығып, ондаған мың адам осы тақырыпта жазба жариялады, деп жазады Ozgeris.info. 

Алайда бұл мәлімет шындыққа жанаспады. Ақ үй өкілдері дереу түсініктеме беріп, Трамптың жағдайы жақсы екенін айтты. Америкалық журналист Барак Равидке берген сұхбатында аты-жөнін атамаған қызметкер:

«Президенттің жағдайы жақсы. Ол бүгін таңертең гольф ойнап жүр»,  деді.

АҚШ баспасөзінің жазуынша, мемлекет басшысы таңертең кортежбен шығып, ақ поло жейде мен қызыл бейсболка киіп жүргені байқалған. Бірақ бұл сәттің суреттерін Ақ үй ресми түрде жариялаған жоқ.

Қауесет қалай шықты? Сарапшылардың пікірінше, бұл әңгімелер Трамптың денсаулығына қатысты бұрыннан келе жатқан алыпқашпа сөздермен, орынбасары Джей Ди Вэнстің соңғы мәлімдемелерімен және «Симпсондар» мультсериалына қатысты интернеттегі әзілдермен тоғысып кеткен. Соның салдарынан желіде жалған ақпарат вирустық трендке айналды.

Ақиқат қандай? Шындығында, Трамп тірі және әдеттегідей өзінің сүйікті ісі – гольфпен айналысып жүр. Яғни әлеуметтік желілердегі «қайғылы хабардың» ешқандай ресми негізі жоқ.

Бұл жағдай тағы бір мәрте интернет қауесеттерінің қаншалықты жылдам тарайтынын және қоғамды дүрліктіре алатынын көрсетті.