Ақтөбе облысында теміржол өткелінде тепловоз бен жүк көлігі соқтығысты. Жол апаты салдарынан жүк көлігінің жүргізушісі зардап шекті, деп хабарлайды Вairaqmedia.kz КТК телеарнасына сілтеме жасап.
Оқиға Әйтеке би ауданындағы Қарабұтақ – Қостанай тасжолында болған. Теміржол өткелінен өтіп бара жатқан жүк көлігі тепловоздың жолына шығып кеткен.
Соққы салдарынан ауыр жүк көлігінің жүргізушісі жарақат алып, аудандық ауруханаға жеткізілді. Дәрігерлер оның ауыр жарақат алмағанын анықтады.
Апаттан кейін теміржол өткелінде ондаған автокөлік жиналып, қозғалыс уақытша шектелді. Мамандар жүк көлігін және жолға кедергі келтірген заттарды алып тастағанша, жүргізушілер шамамен бір сағат күтуге мәжбүр болды.
Жол тазартылғаннан кейін көлік қозғалысы қайта қалпына келтірілді.
