Солтүстік Қазақстан облысында қоныс аударушыларға арнап салынған тұрғын үйлер қараусыз қалып, апатты деп танылды. Мемлекеттік бағдарлама аясында тұрғызылған 14 үй сүрілуге жатады. Ал билік баспаналарын тастап кеткен тұрғындардан мемлекет шығынын өндіріп алуға кіріскен, деп хабарлайды Bairaqmedia.kz КТК телеарнасына сілтеме жасап.
Шал ақын ауданындағы Сергеевка қаласында «Еңбек» мемлекеттік бағдарламасы бойынша алты жыл бұрын қоныс аударушыларға 109 үй салынған. Оған бюджеттен шамамен 800 миллион теңге жұмсалған. Алайда бүгінде соның 80-ге жуығында ғана тұрғындар бар. Қараусыз қалған үйлердің терезелері сынған, қабырғалары бүлінген. Апатты деп танылған 14 баспананың төртеуі сүріліп үлгерген. Жергілікті тұрғын Бейбіт Халматовтың айтуынша, кейбір отбасылардың көшіп кетуіне солтүстіктің ұзақ әрі суық қысы әсер етуі мүмкін.
«Мұнда алты ай қыс болады. Оған алдын ала дайындалу керек. Көмір, отын, малға жем-шөп жинау қажет», – дейді ол.
Ал аудан әкімінің орынбасары Жарқын Мұхамеджанов қоныс аударушылардың кейбірі ешкімге ескертпестен үйлерін тастап кеткенін айтады.
«Қыста кетіп қалғандар болды. Жиһаздарының бір бөлігін қалдырып, үн-түнсіз көшіп кеткен. Іздей бастасақ, телефондары өшірулі. Сондықтан сотқа жүгінуге мәжбүр болдық», – деді әкім орынбасары.
Бағдарлама бойынша қоныс аударушылар баспананы айына 6–8 мың теңгеге жалға алған. Алайда тұрғындар ресми түрде бас тартпайынша немесе сот шешімі шықпайынша, әкімдік үйлерді мемлекет меншігіне қайтара алмаған. Қазір баспаналарын тастап кеткен 40 отбасыға қатысты сотқа талап арыз берілген. Олардан тұрғын үйге жұмсалған қаражатпен қатар, көшуге берілген жәрдемақы мен өзге де мемлекеттік шығындарды өндіріп алу көзделіп отыр.
Дегенмен жергілікті билік кейбір отбасылардан бұл қаражатты қайтару қиынға соғатынын мойындайды.
