АҚШ президенті Дональд Трамп пен Украина басшысы Владимир Зеленский телефон арқылы сөйлесіп, әңгіме нәтижесін оң бағалады, деп хабарлайды Bairaqmedia.kz.

Трамп Truth Social желісінде Зеленскиймен бір сағат бойы «өте жақсы» әңгімелескенін жазды.

Талқылаудың көп бөлігі Ресей мен Украинаның сұраныстары мен қажеттіліктерін келісу үшін президент Путинмен кешегі әңгімеге негізделді. Біз дұрыс жолмен келе жатырмыз, – деді ол.

Зеленский де X әлеуметтік желісінде әңгіме «оң, өте мазмұнды және ашық» болғанын атап өтті.

Президент Трамп Путинмен сұхбатын жан-жақты баяндады. Соғысты тоқтатудағы алғашқы қадамдардың бірі – энергетикалық және азаматтық инфрақұрылымға шабуылдарды доғару болуы мүмкін. Мен бұл бастаманы қолдадым және оны жүзеге асыруға дайын екенімізді растадым, – деді Зеленский.

Сондай-ақ, екі президент алдағы Сауд Арабиясында өтетін келіссөздерді талқылады. Зеленский Киев соққы жасалмайтын нысандардың тізімін дайындайтынын айтты. Оған энергетикалық инфрақұрылыммен қатар, порттар мен теміржол желілері де кіруі мүмкін.

Біз (Ресеймен – ред.) ресми келісімге келмейінше, соғыс жалғаса береді, – деп түйіндеді Украина басшысы.