Қазақстанның Сыртқы істер министрлігі соғыс қимылдары жүріп жатқан аймақта жүрген қазақстандықтарды елге қайтару мәселесі бойынша Ресей тарапымен келіссөз жүргізіп жатыр, деп хабарлады Вairaqmedia.kz.
Ведомство мәліметінше, СІМ-нің жедел желісіне Қазақстан азаматтарынан өтініштер әлі де түсіп жатыр. Қазіргі уақытта олардың әрқайсысы бойынша ақпарат жеке-жеке тексерілуде.
«Тексеру аяқталғаннан кейін жасақталған тізім Ресей тарапына жолданады», – деп хабарлады Сыртқы істер министрлігі.
Сонымен қатар әлеуметтік желілерде видеоүндеу жариялап, көмек сұраған Қазақстан азаматтарына қатысты тиісті шаралар қолға алынған.
«Оларды Отанына қайтару бойынша келіссөздер жүргізіліп жатыр», – делінген министрлік хабарламасында.
СІМ бұл мәселе бойынша Ресей тарапымен әртүрлі деңгейде тұрақты байланыс орнатылғанын атап өтті.
Бұған дейін әлеуметтік желілерде соғыс қимылдары жүріп жатқан аумақта жүрген қазақстандықтардың видеоүндеулері тараған еді. Олар елге қайтуға көмектесуді сұраған.
