Жамбыл облысы Меркі ауданында қаза тапқан 19 жастағы Мадинаның анасы қызының отбасылық өмірінде көрген қиындықтары туралы айтты. Ол журналист Айнұр Асанбердіге берген сұхбатында қызының күйеуінен бірнеше рет зорлық-зомбылық көргенін жеткізді, деп хабарлайды Bairaqmedia.kz.
Марқұмның анасының айтуынша, Мадина күйеуі Мадиярдың қол көтеретінін айтып, бірнеше рет төркініне қайтып келген. Алайда күйеуі кешірім сұраған сайын отбасына қайта оралып отырған.
Сондай-ақ әйел қызының бір рет полицияға шағымданғанын, бірақ енесінің ескертуінен кейін құқық қорғау органдарына қайта жүгінбегенін мәлімдеді. Оның сөзінше, Мадинаның қайын атасы түрмеде жазасын өтеп жүрсе де, келінінің күйеуіне қайтып баруын талап еткен.
«Қызым күйеуінің ұратынын айтатын, неше рет қайтып келді. Мадияр сол күні кешірім сұрап, звондайды, сол күні қайтадан кетеді үйіне. “Кетпе, кетпе” десем де, қайтып кететін. Полицияға бір рет шағымданған. Бірақ енесі: “Қызым, қайын атаң түрмеде жатыр, неге сен үйге полиция әкелесің?” деген. Содан кейін шақырмайтын болған.
Мадиярдың әкесі түрмеде. Авария жасап, бір адамды өлтіріп алған. Ол түрмеде болса да, қызым үйге келсе, “Қайт, қайт” деп звондайды. “Атамның сөзі – сөз” дейтін. Өзім әкесіз өстім деп, қатты сыйлайтын», – деді Мадинаның анасы.
Айта кетейік, Меркі ауданында 19 жастағы Мадинаның қазасы қоғамда үлкен резонанс тудырған болатын. Марқұмның анасы қызының отбасындағы жағдайына қатысты жаңа мәліметтерді бөлісті.
