Бастауын Қырғызстаннан алатын Шу өзенін 12 мың сиыры бар шаруа қожалығы өз қорасына бұрып алған. Бұл туралы Мәжіліс депутаты Мақсат Толықбай мәлімдеді деп хабарлайды bairaqmedia.kz

Шу трансшекаралық өзен болғандықтан, бір сағасы Сырдарияға барып қосылуы керек. Алайда, өзен суы етектегі елге жетпей, Созақ даласы сорға айналып жатыр дейді депутат.

Тас пен топырақтан бөгет салып, өзеннің ағысын тоқтатып тастаған мойынқұмдық бизнесменге сот жоқ көрінеді. Оның шаруа қожалығында 12 мың ірі қара бар екен.

Депутаттың айтуынша, маусым айында Жамбыл облысына барған жұмыс сапарында бұл мәселенің мән-жайын Премьер-министрдің өзі сұраған. Алайда,  жергілікті  шенеуніктер мен салалық министірлік бұл «жалған ақпарат» деп Олжас Бектеновті кері қайтарыпты. Созақтағы су тапшылығына алаңдаған депутат су ресурстары министрінің бұл фазенданы неге сонша қорғаштап отырғанына шүйлікті.

Расында аңқасы кепкен аймақтың тұзы шығып, өзен жағалаған 80 мың халық экологиялық апатқа душар болудың алдында тұр. Созақтықтардың онсызда уран өндірісінен көріп жатқан экологиялық зардабы аз емес екенін тағы білесіздер. Жығылғанға жұдырық. Енді міне, судың жоқтығынан жайлауы сорға, жазығы қу-тақырға айналып, малмен күнелткен халық шабындық шөптің өзін Қызылордадан сатып алуға мәжбүрміз дейді. Әйтпесе, бір кездері Сырдарияға дейін жететін Шу өзенінің екі жағы қамыс, айналасы шабындық болған. Қазір әр жерден бір бөлініп қалған тоған суларынан – сасыған балдырдан басқа, қылтанақ та таппайсың, - деді депутат Мәжілісте.

Мақсат Толықбай су ресурстары министрінен тез арада су реттегіш құралдар мен заңсыз салынған бөгеттерді бұзуға пәрмен беруді талап етті. Сондай-ақ, гидротехникалық құрылыс-жайлардың іс жүзіндегі есебі жүргізілсе дейді. Әрі мониторинг пен бақылауды күшейтіп, өзенге механикалық тазалау жұмыстарын жүргізуді сұрады.