«Astana Motors» компаниясының негізін қалаушы Нұрлан Смағұлов «Қайрат» бапкері Рафаэль Уразбахтин мен қақпашы Темірлан Анарбекке құрмет көрсетіп, сый жасады, деп жазады bairaqmedia.kz.

qsport.kz инстаграм парақшасының мәліметінше, бас бапкер Рафаэль Уразбахтинге су жаңа Hyundai Palisade көлігі, ал пенальтиде үш соққыны қайтарған қақпашы Темірлан Анарбекке  Apple MacBook сыйланды.

Журналист Диас Нұрақын елді әлемге танытқан қақпашыға айпад сыйлау - сараңдық деп отыр. 

«Ақ шляпа киген ағам Форбс тізімінен түспейді. Еліміздегі Мега центрдің бәрі осы кісінікі. Мініп жүрген «отандық» көліктің бәрі осы кісінікі. Ол аздай Тойота, Лексус, БМВ, Хавал сияқты шетелдік брендтердің ресми дистрибьюторы болып алған. Қысқасы қаржысы қалтасына сыймай жатыр. Байлығы бес облыстың бюджетін басып озады. Бірақ сәл сараңдау сияқты. Бүгін Қайрат клубының бас бапкеріне көлік мінгізіпті. Ал, 120 минутта жұлдызы жанып, командасына жеңіс сыйлаған қақпашы Темірлан Анарбековке айпад беріпті. Айпадты мен ақ бере салар едім ғой. Нұрлан Смағұлов көкем Темірланға толып жатқан темір тұлпарының бірін қимай қалыпты. Жылына 45 мың көлік құрастырамыз деп бөскенде бөркі көкке жетеді. Бір кем дүние ай. Берсең екеуіне де бер, бермесең тымырайып жата берсеңші…»,-деп жазды ол күйіне. 

Әлеуметтік желі қолданушылары да қақпашының еңбегі лайықты бағаланбады деп түрлі пікір қалдырған.

«Бермей-ақ қоймадыңдар ма», «Қақпада тұрған Анарбеков еді ғой. Кәмпит беріп алдағандай болыпты. МасBook бергені несі», «Ұят. Еңбегін бағалау керек. Темірлан тіл-көзден аман болсын» «Көліктің фонына қойып макбук берді. Ұятын-ай», - деп жазып жатыр олар.

Айта кетейік, алматылық клуб тарихындағы алғаш рет Чемпиондар лигасының жалпы кезеңіне жолдама алған болатын.