Су жаңа «Қайсар – Арена» стадионынан кейін Қызылордада ауқымды жоба – Еуропаның үздік футбол мектептері үлгісімен салынатын «Қайсар» футбол академиясының құрылысы 2026 жылы басталмақ. Академияда жас спортшыларға арналған жатақхана, мектеп, асхана және жеті жаттығу алаңы қарастырылады, деп хабарлайды bairaqmedia.kz

Қызылордада кәсіби футболды дамыту бағытында жаңа дәуір басталғалы тұр. «Қайсар – Арена» стадионының пайдалануға берілуі өңір спортындағы маңызды қадам болса, енді осы жетістікті толықтыратын жаңа жоба – «Қайсар» футбол академиясының құрылысы 2026 жылы қолға алынады.

 

“Жоспар бойынша мұнда 350 орындық жатын ғимарат, заманауи мектеп, кең асхана, алты ашық және бір жабық жаттығу алаңы салынбақ. Бұл орталықта қызылордалық жас футболшылар хорватиялық «Динамо Загреб» пен португалиялық «Спортинг» академияларының ең озық әдістемесі бойынша дайындалады”, - делінген ресми хабарламада.

Клуб жекеменшікке өткеннен кейін жаңа инвестор инфрақұрылымдық жаңғыртуды жылдам бастап, жергілікті футболды жүйелі түрде дамытуға күш салуда. Ал жаңа академия болашақта Сыр өңірінен жаңа футбол жұлдыздарының шығуына мүмкіндік береді. 

Бүгінде Қызылорда облысында спортпен тұрақты шұғылданатындар саны 343 мың адамнан асып, 40,4 пайызға жеткен. Осы бағыттағы жұмыстың нақты нәтижесі – құны 26,5 млрд теңгені құрайтын 11 мың орындық жаңа стадионның бой көтеруі. Қаладағы сол жағалауда салынған алып нысанның жалпы ауданы 20 мың шаршы метрді қамтиды. Мұнда футбол алаңымен бірге заманауи талапқа сай бокс, дзюдо, еркін және грек-рим күресі, спорттық гимнастика, ауыр атлетика, таеквондо және фитнес залдары орналастырылған.

Барлық спорт алаңдары халықаралық олимпиадалық стандарттарға сәйкес құрал-жабдықтармен қамтылады. Ғимараттың бірінші қабатында түрлі спорт түрлеріне арналған оқу-жаттығу орындары мен футболшылардың арнайы дайындық бөлмесі бар. Екінші қабатта әкімшілік кеңселер орналасса, үшінші қабатта үлкен жиындар өткізуге арналған мәжіліс залы қарастырылған. Сонымен бірге мүмкіндігі шектеулі спортшылардың жаттығуына қолайлы жағдай толық жасалған.

Стадионның тағы бір маңызды ерекшелігі – оның UEFA-ның IV санатына сәйкестендірілгені. Жасанды жабынды соңғы технологиялармен төселіп, халықаралық талаптарға сай жарықтандыру жүйесі орнатылған. Бұл өз кезегінде Қызылордада ірі халықаралық спорттық жарыстар мен мәдени шараларды жоғары деңгейде өткізуге жол ашады.

 Жуырда Мемлекет басшысы Қасым-Жомарт Тоқаев жаңа стадионға арнайы барып, нысанның мүмкіндіктерімен танысты. Президент «Қайсар» футбол клубының ойыншыларымен жүздесіп, команданың болашағына сенім білдірді.

«Қайсар – елімізде жеке меншікке өткен алғашқы клубтардың бірі. Алдағы уақытта футбол академиясы салынады. Клубтың келешегі жарқын болады деп ойлаймын», – деді Мемлекет басшысы. 

Қызылордада бой көтеріп жатқан жаңа спорттық инфрақұрылым өңір спортының дамуына серпін беріп, жас буынға кәсіби деңгейде білім алып, халықаралық стандарттар негізінде жаттығуға бірегей мүмкіндік ашады. Жаңа стадион мен алдағы академия құрылысы Сыр елінің спорттық әлеуетін жаңа белеске көтеретіні сөзсіз.