АҚШ президенті Дональд Трамтың қазақстандық тауарларға салынатын баж салығын өсіруі екі ел арасындағы тауар айналымына соншалықты әсер ете қоймайды. Бұл туралы Сауда және интеграция министрлігі мәлімдеді, деп хабарлайды Bairaqmedia.kz.
АҚШ тарапынан қабылданған жаңа сауда шараларын алдын ала талдау нәтижесінде, Қазақстаннан АҚШ-қа экспортталатын тауарларының елеулі бөлігіне қосымша тарифтердің әсері болмайтыны анықталды. Өйткені олар АҚШ әкімшілігінің нормативтік актілерінде көзделген ерекшеліктер тізіміне енгізілген, – делінген министрлік хабарламасында.
Ұлттық статистика бюросының мәліметтері бойынша, 2024 жылдың нәтижесі бойынша Қазақстан мен АҚШ арасындағы тауар айналымы 4,2 млрд АҚШ долларға жетті. Бұл өткен жылмен салыстырғанда 4%-ға артық (4,1 млрд АҚШ доллары). Қазақстанның АҚШ-қа экспорт көлемі 2024 жылы 30,6%-ға артып, 2,0 млрд АҚШ доллар болды. АҚШ-тан Қазақстанға импорт көлемі 2,2 млрд АҚШ доллары болды.
Қазақстанның АҚШ-қа экспорт құрылымында негізгі орын алатын тауарлар — шикі мұнай, уран, күміс, ферросплавтар және басқа да тауарлар. Бұл санаттағы өнімдер АҚШ Президентінің «Тауарлар саудасындағы маңызды және тұрақты тапшылықты жою мақсатында өзара тарифтер арқылы импортты реттеу туралы» Жарлығы бойынша ерекшеліктер тізіміне енгізілген тауарлардың 92% құрайды.
Қосымша баждар белгілі бір тауар топтарына қатысты енгізілетін болады. Бұл санаттағы тауарлардың экспорт көлемі былтыр 95,2 млн АҚШ долларын құрады. Олардың ішінде — фосфор (2024 жылы экспорт көлемі 15,9 млн АҚШ доллары), ферросилиций (12,7 млн АҚШ доллары), линзалар (4,1 млн АҚШ доллары), бидай клейковинасы (4 млн АҚШ доллары), аммоний нитраты (2,4 млн АҚШ доллары). Қабылданған тарифтік шаралар Қазақстанның АҚШ-қа жалпы экспортының тек 4,8%-ына ғана әсер етеді. Үкімет Қазақстанға қатысты қосымша баждарды қолданбау мүмкіндігін талқылау үшін АҚШ тарапымен консультациялар жүргізуге ниетті, – деп қосты министрлік өкілдері.
Сонымен бірге ведомство өкілдері Қазақстан 10 жыл бойы Дүниежүзілік сауда ұйымының (ДСҰ) мүшесі болғанын және сыртқы сауда саясатын жүзеге асыруда ұйымның принциптерін қатаң ұстанатынын атап өтті. АҚШ-пен екіжақты ынтымақтастық аясында Қазақстан халықаралық міндеттемелерге сәйкес саудада тең және кемсітушілікке жол бермейтін жағдайларды қамтамасыз етеді.
