Қазақстанның футбол федерациясы (ФФК) мен бірқатар футбол клубтарына жүргізілген прокурорлық тексеру нәтижесінде басқарудағы тиімсіздік пен 3 млрд теңге көлемінде қаржылық бұзушылықтар анықталды, деп хабарлайды Bairaqmedia.kz.

Негізгі заңбұзушылықтар:

🔹 300 млн теңге негізсіз сыйақы — кейбір қызметкерлер мен спортшыларға негізсіз төлемдер жасалған;
🔹 350 млн теңге «желге ұшты» — Талғардағы жаттығу базасы мен әкімшілік ғимараттың құрылысына бөлінген қаржы мақсатсыз жұмсалған;
🔹 135 млн теңге құжаттарға жұмсалды, бірақ нәтиже жоқ — футболды дамыту стратегиялары тиімсіз әзірленген;
🔹 Футбол клубтарындағы күмәнді келісімшарттар — ойыншыларды төмен бағамен сату, жоғары бағамен сатып алу және қаражат жымқыру фактілері анықталды.

«Ордабасы», «Ақтөбе» және «Жетісу» футбол клубтарындағы тексерулер кезінде де келісімшарт сомаларын асырып көрсету, ойыншыларды сатудағы күмәнді схемалар мен қаражатты жымқыру фактілері белгілі болды, – делінген прокуратура хабарламасында.

Қаржылық мониторинг агенттігі бұл істер бойынша сотқа дейінгі тергеу жүргізіп жатыр.

Бас прокуратура футбол саласындағы заңдылық пен ашықтықты қамтамасыз ету бойынша жұмыстарды жалғастыратынын мәлімдеді.