Мәдениет және ақпарат министрі Аида Балаева «Қазақфильм» киностудиясын қатысты қоғамда алаңдаушылық тудырып отырған бірқатар мәселеге түсініктеме берді, деп хабарлайды Bairaqmedia.kz.
Министр алдымен кино саласына қатысы бар тұлғалардың киностудия төңірегіндегі процестерге қатысты өз пікірін білдіруге құқығы барын, алайда ақпарат таратқанда тек фактілерге сүйенуге кеңес берді.
«Қазақфильм» жерінің сатылуы жөніндегі негізсіз қауесет біржола тоқтатылуы тиіс. «Қазақфильмге» тиесілі жерлер киностудия иелігінде қала береді. Жер сатылған жоқ және тек кинематография мүддесі үшін пайдаланылып отыр, – деді Аида Балаева.
Сондай-ақ ол киностудияны жөндеуге қомақты қаржы салуға дайын инвесторлардың бары жайында мәлімдемелерді құжаттармен немесе нақты кепілдіктермен растай алмайтын адамдар таратып отырғанын атап өтті.
Мемлекет, яғни Мәдениет және ақпарат министрлігі нақты инвесторлармен жұмыс істеуге дайын. Дегенмен әзірге ешқандай нақты ұсыныс, бірде-бір кепілдік хаты жоқ. Барлығы тек әңгіме деңгейінде, – деді министр.
Аида Балаева киностудияны Астанаға көшіру туралы ақпаратты да жоққа шығарды.
Бұл да ешқандай негізі жоқ қауесет. Қазір елордаға «Қазақанимация» шығармашылық бірлестігін көшіру мүмкіндігі қарастырылып жатыр. Мұнда маңызды жайт – «Қазақанимация» өндірістік база емес, анимациялық контент жасауға тапсырыстарды бөлетін құрылым. Сондықтан оның Астанаға көшуі саланың жұмысына еш кедергі келтірмейді. Өкінішке қарай, кейінгі бес жылда елімізде сапалы анимациялық фильмдер түсірілген жоқ. Осыған байланысты анимациялық индустрияны Креативті индустриялар қорының аясында дамыту орынды болмақ. Қор құрылымында анимацияны дамытуға бағытталған креативті хаб жасақталуда, – деп толықтырды министр.
Ведомство басшысы жаңа заңға сәйкес елімізде фильмдерді қаржыландырудың жалпы көлемінің кемінде 30%-ы жыл сайын тікелей «Қазақфильмге» бағытталатынын атап өтті.
Атап айтқым келетіні, «Қазақфильм» тек кинотуындылар ғана емес, ең алдымен – шаруашылық жүргізуші компания және бәсекеге қабілетті нарық қатысушысы. Ол жоғары кәсіби киноөнердің дамуына лайықты жағдай жасайды. Сондықтан министрлік бұл кәсіпорынды режиссер немесе актер емес, киностудия қызметін табысты әрі тиімді жүргізуге қабілетті кәсіби менеджер басқаруы тиіс деген қағиданы берік ұстанады.«Қазақфильмнің» тұрақты әрі тиімді дамуын қамтамасыз ету үшін министрлік жан-жақты қолдау көрсетуді жалғастыра береді, – деп түйіндеді Амда Балаева.
