Қарағандыда бірден төрт автокөліктің қатысуымен жол-көлік оқиғасы болды. Салдарынан екі адам зардап шегіп, ауруханаға жеткізілді, деп хабарлайды Bairaqmedia.kz.
Жол апаты Карл Маркс көшесінде, «Голубые пруды» аялдамасының маңында болған. Қарағанды облыстық Полиция департаментінің мәліметінше, Haval, Lexus, Kia және Hyundai маркалы автокөліктер соқтығысқан.
Апат салдарынан Lexus көлігінің 28 жастағы жүргізушісі мен Haval автокөлігінің 57 жастағы жолаушысы зардап шекті. Екеуі де медициналық мекемеге жеткізілген.
Оқиға орнынан түсірілген кадрлардан көліктердің бірі қарама-қарсы қозғалыс бағыттарын бөліп тұрған жол қоршауына соғылғанын көруге болады. Қазіргі уақытта жол-көлік оқиғасы полицияда тіркеліп, апаттың себептері мен мән-жайы анықталып жатыр.
