Шетелде жүрген қазақстандық балалар елге аман-есен оралып, ата-аналарымен қауышты. Бұл туралы Мейірман Шекеев әлеуметтік желідегі парақшасында хабарлап, балалардың елге қайтарылуына атсалысқан азаматтарға алғысын білдірді, деп хабарлады Вairaqmedia.kz.
Мейірман Шекеев қуанышты жаңалықты көпшілікпен бөлісіп, балалардың елге оралуы ата-аналар үшін ерекше сәт болғанын жеткізді. Ол бұл іске Мемлекет басшысы Қасым-Жомарт Тоқаевтың, Сыртқы істер министрлігі өкілдерінің және өзге де азаматтардың үлес қосқанын атап өтті.
«Бұл қуанышты сөзбен жеткізу мүмкін емес. Көңіл толқығанда не айтарыңды да білмей қалады екенсің...
Әуелі Алла, одан соң, әрине, Мемлекет басшысы Қасым-Жомарт Кемелұлы Тоқаевқа, Сыртқы істер министрлігінің осы іске атсалысқан әрбір өкіліне және осы балалардың елге аман-есен оралуына титтей де себепші болған барша азаматтарға ата-аналардың атынан және өз атымнан шын жүректен алғысымды білдіремін», – деп жазды ол.
Сондай-ақ Мейірман Шекеев балаларды Мәскеу әуежайынан шығарып салуға көмектескен Гүлмира есімді қарындасы мен Қуандық есімді інісіне де ризашылығын жеткізді. Оның айтуынша, балалардың Қазақстанға оралуы – жай ғана сапардың аяқталуы емес, ұзақ уақыт бойы перзенттерін күткен ата-аналардың үміті ақталған ерекше сәт.
«Бұл – жай ғана қайту емес. Бұл – ата-ананың көз жасы, отбасының үміті, баланың, Қазақстан азаматтарының елге оралуы.
Осы балалардың әрқайсысы бүгін өз жерінде, өз елінде, өз ата-анасының жанында. Аллаға сансыз шүкір», – деді Мейірман Шекеев.
Айта кетейік, Мейірман Шекеев жариялаған жазбада балалардың нақты саны, олардың шетелде қандай жағдайда болғаны және елге қайтару жұмыстарының қанша уақытқа созылғаны көрсетілмеген. Дегенмен оның мәлімдеуінше, балалардың барлығы Қазақстанға аман-есен оралып, ата-аналарының жанында.
