Сенаттың кулуарында Туризм және спорт вице-министрі Серік Жарасбаев спорт саласындағы діни радикализммен күрес мәселесіне қатысты сұрақтарға жауап берді, деп хабарлайды Bairaqmedia.kz.

Министрлік спорттағы діни радикализммен қалай күреседі?

Журналистер спорт федерацияларына терроризм мен экстремизмге қарсы шараларды міндеттеу туралы жол картасы қабылданғанын еске салып, оның қалай жүзеге асатынын сұрады.

«Спортшыларға сақал қоюға, уағыз айтуға тыйым саласыздар ма?» деген сұраққа вице-министр басымдық түсіндіру жұмыстарына берілетінін айтты.

Біз ең алдымен профилактикалық, түсіндіру жұмыстарын жүргіземіз. Оған теологтар мен дін комитетінің қызметкерлері тартылады. Бұл міндет федерацияларға да беріледі, – деді Серік Жарасбаев.

Спортшылардың сырт келбетіне тыйым салына ма?

Журналистердің сырт келбетке қатысты нақтылаған сұрағына вице-министр құзырлы органдарға ақпарат берілетінін атап өтті.

Егер сақал қою немесе шолақ шалбар кию радикализмнің белгісі ретінде танылса, бұл туралы ақпарат құқық қорғау органдарына жолданады, – деп мәлімдеді.

Министрлік спорттағы діни радикализмге қарсы кешенді жұмыстар жүргізіп, алдын алу шараларын күшейтуге ниетті.