Сенат міндетті әлеуметтік медициналық сақтандыру және медициналық қызмет көрсету мәселелері бойынша түзетулерді мақұлдады, деп хабарлайды Bairaqmedia.kz.

Бұл өзгерістердің мақсаты – медициналық көмектің қолжетімділігі мен сапасын арттыру, қаржы айналымының ашықтығын күшейту және МӘМС жүйесінің тұрақтылығын нығайту.

Сондай-ақ халықты сақтандыру жүйесімен қамтуды кеңейту, медициналық қызмет көрсету саласында бақылау және жедел әрекет ету тетіктерін енгізу қарастырылған.

ЕНГІЗІЛГЕН БАСТЫ ӨЗГЕРТУЛЕР:

• Жұмыссыздар мен әлеуметтік осал топтардың медициналық көмекке қолжетімділігі қамтамасыз етіледі (олар үшін жарнаны жергілікті әкімдіктер төлейді); 
• МӘМС қаражатының қозғалысы мен пайдаланылуы туралы деректерді міндетті түрде жариялау енгізіледі;
• Қызмет сапасыз көрсетілген жағдайда қаражатты қайтару тетігі көзделген;
• Медициналық қызмет көрсету саласындағы заңбұзушылықтарға жедел ден қою және бақылау механизмі орнатылады;
• Жасушалар, тіндер мен гемопоэтикалық дің жасушаларын трансплантациялау қызметі лицензияланатын болады;
• Сирек (орфандық) аурулары бар науқастар дәрі-дәрмекпен тегін қамтамасыз етіледі – бұл шығындар МӘМС және басқа көздер есебінен жабылады;
• I топтағы мүгедектігі бар, зейнет жасындағы адамдардың жұбайларына олардың жеке көмекшісі болу құқығы бекітіледі;
• «Адам ағзасы», «адам жасушасы», «әлеуметтік мәні бар аурулар» ұғымдары нақтыланды.