Атырау облыстық полиция департаменті былтыр жоғалған отбасыға қатысты жалған мәлімет таратпауға үндеді, деп хабарлайды bairaqmedia.kz.
Жангелді ауылының тұрғындары – ерлі-зайыпты, олардың қызы мен ұлы белгісіз бағытқа шығып, осы уақытқа дейін қайтып келмеген. Ал желтоқсанның соңында отағасының апасы полицияға арыз түсірген.
Сол екі арада осы отбасының тағы бір қызы мен күйеу баласы із-түзсіз жоғалған. Полицейлер олар Сарыағаш жақтағы Қапланбек бекеті арқылы Өзбекстанға өтіп кеткенін анықтады.
"Күйеу баласының анасын сұрастыру барысында ұлы келінді емдеуге алып бара жатқанын айтып кеткен. Ол анасымен бірнеше рет сөйлескен. Қазіргі кезде анасы іздеу салып жатқан жоқ. Соған қарамастан, арыз алып, іздеу салуға тура келіп отыр", - дейді департамент бастығының бірінші орынбасары Құттыбай Садықов.
Ал жоғалған төрт адамның ұялы телефоны Шымкент қаласында өшірілген. Әзірше, олардың жүрген жері анықталған жоқ.
Полиция осы үйдің күйеу баласы бес баласын Махамбет ауданында тұратын анасына тастап кеткенін де растады.
